კოლიბრები

მასალა ვიკიპედიიდან — თავისუფალი ენციკლოპედია
გადასვლა: ნავიგაცია, ძიება
კოლიბრები
Hummingbird.jpg
მეცნიერული კლასიფიკაცია
სამეფო: ცხოველები
რიგი: ნამგალასნაირნი
ლათინური სახელი
Trochili

კოლიბრები (Trochili), ფრინველების ქვერიგი ნამგალასნაირთა რიგისა. მათი სხეულის სიგრძე 5,7-21,6 სმ, მასა 1,6- 20 გრამს აღწევს. შეფერილობა ნაირგვარია და მკვეთრი ლითონისებრი ელვარება დაკრავს. აქვს გრძელი, წვრილი და სწორი ნისკარტი, ზოგჯერ ქვემოთკენ მოხრილი. მეტად სუსტი, სასიარულოდ გამოუსადეგარი ფეხები, სხეულთან შეფარდებით დიდი გული, რომელიც წუთში 1000-მდე იკუმშება. კოლიბრები შესანიშნავად ფრენენ და შეუძლიათ ჰაერში ერთ ადგილზე ლივლივი. გადამფრენია. ღამით, გარემოს ტემპერატურის დაცემისას, სხეულის ტემპერატურაც ეცემა 14,5-21 °C-მდე. კოლიბრები უფრო ყვავილების ნექტარით იკვებებიან, პატარა მწერებს და ობობებსაც ჭამენ. დედალი ბუდეს ამაგრებს ტოტებზე, ფოთლებზე, კლდეზე. დებს 2 კვერცხს. საინკუბაციო პერიოდი 14-19 დღე გრძელდება, იჩეკებიან ტიტველი თვალაუხილავი და უსუსური ბარტყები. კოლიბრების ქვერიგში 1 ოჯახის 319 სახეობაა. გავრცელებული არიან დასავლეთ ნახევარსფეროში - უმთავრესად ტროპიკულ ნაწილში. თუმცა ზოგიერთი სახეობა საკმაოდ შორსაც ვრცელდება როგორც ჩრდილოეთით, ისე სამხრეთით.

ათასობით კილომეტრის მოშორებით, ამერიკის კონტინენტზე, სათითის ზომის მინიატურული ბუდე ხის ტოტზეა მიკრული. აქ კოლიბრის ერთ-ერთი სახეობის (Calypte helenae) წყვილი, რომელიც ზომით მფრინავ მწერებს არ აღემატება, ორ პატარა ბარტყს დასტრიალებს. ეს ჭრელი ფრინველები, რომლებიც გასაოცარი სიჩქარით ფრენენ, გულადი მშობლები არიან; ისინი ცდილობენ, განდევნონ ყველა, ვინც კი მათ პატარებთან მიახლოებას გაბედავს, დიდი ცხოველებისა და ადამიანების ჩათვლით.

რესურსები ინტერნეტში[რედაქტირება | წყაროს რედაქტირება]

ლიტერატურა[რედაქტირება | წყაროს რედაქტირება]

  • კუტუბიძე მ., ქსე, ტ. 5, გვ. 580, თბ., 1980