გიორგი შუშანაშვილი

გიორგი შუშანაშვილი
დაბადების თარიღი	4 აგვისტო, 1907 თიანეთი
გარდაცვალების თარიღი	1993 თბილისი
პროფესია	ფილოსოფოსი, ფილოსოფიის მეცნიერებათა დოქტორი

გიორგი შუშანაშვილი (დ. 4 აგვისტო, 1907, თიანეთი ― გ. 1993, თბილისი) — ქართველი ფილოსოფოსი, მეცნიერებათა დოქტორი (1968).

ბიოგრაფია

ქართველი ფილოსოფოსი გიორგი ისაკის ძე შუშანაშვილი დაიბადა 1907 წლის 4 აგვისტოს თიანეთის მაზრის სოფელ თიანეთში. საშუალო განათლების მიღების შემდეგ ეწევა საგანმანათლებლო საქმიანობას. 1931-1936 წლებში სწავლობდა თბილისის სახელმწიფო უნივერსიტეტში ფილოსოფიის სპეციალობაზე. 1937-1938 წლებში მატერიალური მდგომარეობის გამო იგი ვეღარ აგრძელებს სწავლას და ბრუნდება მშობლიურ სოფელში, სადაც საშუალო სკოლაში ასწავლის ისტორიასა და გერმანულ ენას, 1938-1939 წლებში კი თიანეთის რაიონის განათლების განყოფილების გამგეა.

1939 წელს სწავლას აგრძელებს თბილისის სახელმწიფო უნივერსიტეტის ასპირანტურაში, ფილოსოფიის განხრით. 1946 წელს დაიცვა საკანდიდატო დისერტაცია, ამავე წელს იგი მეცნიერებათა აკადემიასთან ახლადჩამოყალიბებული ფილოსოფიის ინსტიტუტის ერთ-ერთი პირველი თანამშრომელია. 1968 წელს დაიცვა სადოქტორო დისერტაცია.

გიორგი შუშანაშვილი გარდაიცვალა 1993 წელს, თბილისში, დაკრძალულია დაბა თიანეთში.

ლიტერატურა

XX საუკუნის ქართული ფილოსოფიის ანთოლოგია. II ტომი, II ნაკვეთი, თბილისი, 2002, გვ. 5.