რევაზ ჩოგოვაძე
რევაზ (რევი) ჩოგოვაძე (დ. 5 მარტი, 1944, თბილისი) — ქართველი ინჟინერი, მეცნიერი.
ბიოგრაფია[რედაქტირება | წყაროს რედაქტირება]
1966 წელს დაამთავრა საქართველოს პოლიტექნიკური ინსტიტუტის ავტომატიკისა და გამოთვლითი ტექნიკის ფაკულტეტი.
მუშაობა დაიწყო ავტომატიზაციის საშუალებათა თბილისის სამეცნიერო კვლევით ინსტიტუტში ინჟინრად, სადაც მონაწილეობდა M-1000 გამოთვლითი სისტემის პროექტირებაში. 1970-1973 წწ. იყო მივლინებული ასპირანტი სსრკ მეცნიერებათა აკადემიის მართვის პრობლემების ინსტიტუტში, სადაც აკად. ივერი ფრანგიშვილის ხელმძღვანელობით მუშაობდა ახალი თაობის მატრიცული და ასოციაციური პარალელური პროცესორების თეორიული საფუძვლების დამუშავებაზე. 1973-1982 წწ. იყო საქართველოს სოფლის მეურნეობის საწარმოო-ტექნიკური უზრუნველყოფი სახელმწიფო კომიტეტის რესპუბლიკური საინფორმაციო-გამოთვლითი ცენტრის გამოთვლითი ტექნიკისა და პროგრამირების განყოფილების გამგე, დირექტორის მოადგილე, დირექტორი - დარგობრივი მართვის ავტომატიზებული სისტემის გენერალური კონსტრუქტორი. 1983-1993 წწ. იყო საქართველოს მთავრობის აგროსამრეწველო კომპლექსის საკითხთა სახელმწიფო მრჩეველი, 1985 წ. შეიმუშავა რეგიონალური სასურსათო პროგრამების კონტროლისა და ანალიზის ავტომატიზებული სისტემა. 1994-2002 წწ. იყო საქართველოს სახელმწიფო კორპორაცია "საქაგროტექსერვისის" ვიცე-პრეზიდენტი, ს/ს "საქსოფლტექნიკის" სამეთვალყურეო საბჭოს თავმჯდომარის მოადგილე. 2003-2019 წწ. იყო საქართველოს ტექნიკური უნივერსიტეტის მანქანური ინტელექტის სამეცნიერო-კვლევითი ცენტრის ხელმძღვანელის მოადგილე, ინფორმატიკისა და მართვის სისტემების ფაკულტეტის ხელოვნური ინტელექტის დეპარტამენტის პროფესორი. არის აკადემიური დოქტორი, მრავალი სამეცნიერო ნაშრომისა და სახელმძღვანელოს ავტორი, მიღებული აქვს სახელმწიფო და სხვა ჯილდოები. 2020 წელს განსაკუთრებული დამსახურებისა და ნაყოფიერი სასწავლო-სამეცნიერო საქმიანობისათვის მიენიჭა საქართველოს ტექნიკური უნივერსიტეტის ემერიტუსის აკადემიური წოდება.
სადისერტაციო თემა - "სახეთა ამოცნობაში გადაწყვეტილებათა მიღების პროცესის მოდელირება ნეირონული ქსელებით".
ჯილდოები[რედაქტირება | წყაროს რედაქტირება]
- სსრკ სახალხო მეურნეობის მიღწევათა გამოფენა (ВДНХ), ბრინჯაოს მედალი სასოფლო-სამეურნეო ტექნიკის მარაგნაწილებით მომარაგების საინფორმაციო-საძიებო სისტემის შემუშავება-დანერგვისათვის
- მედალი "შრომითი მამაცობისთვის" საქართველოს სოფლის მეურნეობის საწარმოო-ტექნიკური უზრუნველყოფის მართვის ავტომატიზებული სისტემის პირველი რიგის შემუშავება-ფუნქციონირებისა და ხელმძღვანელობითვის
ბიბლიოგრაფია[რედაქტირება | წყაროს რედაქტირება]
- ჰიბრიდული ინტელექტუალური სისტემები : სახელმძღვანელო (ავტორი). - თბილისი, ტექნ. უნ-ტი, 2016. - 148გვ.. - ISBN: 978-9941-20-641-2
- ხელოვნური ინტელექტის საფუძვლები : სახელმძღვ. სტუდ. (თანაავტორი). - თბილისი, ტექნ. უნ-ტი, 2007. - 156გვ.. - ISBN: 978-99940-95-76-6
- ხელოვნური ნეირონული ქსელები (ავტორი). - თბილისი, ტექნ. უნ-ტი, 2006. - 130გვ.. - ISBN: 99940-57-01-4
- ნეიროინფორმატიკის საფუძვლები : სახელმძ. სტუდენტებისათვის (ავტორი) // ნაწ.1. - თბილისი, ტექნ. უნ-ტი, 2005. - 144გვ.. - ISBN: 99940-35-65-7
- საქართველოს სოფლის მეურნეობის მატერიალურ-ტექნიკური მომარაგების მართვის ავტომატიზებული სისტემა (ავტორი). - თბილისი, 1977. - 5გვ.
- ელექტრონული გამოთვლითი მანქანების ტექნიკური ექსპლუატაციის საკითხები მართვის ავტომატიზებულ სისტემაში : მეთოდური მითით. (ავტორი). - თბილისი, საკონსტრ. პროექტ. ინსტ-ტი, 1975. - 124გვ.