რაჟდენ გუმბა

რაჟდენ ჯგუტას ძე გუმბა (დ. 12 სექტემბერი, 1926, სოფ. დურიფში, ახლანდ. გუდაუთის მუნიციპალიტეტი, — გ. 17 ივლისი, 2007, სოხუმი) — აფხაზი კომპოზიტორი, საქართველოს სსრ ხელოვნების დამსახურებული მოღვაწე (1958), აფხაზეთის ასსრ ხელოვნების დამსახურებული მოღვაწე (1970), აფხაზეთის ასსრ სახალხო არტისტი (1984), საქართველოს სსრ სახალხო არტისტი (1988).

1957-1959 წლებში სწავლობდა თბილისის სახელმწიფო კონსერვატორიაში. 1971 წელს დაამთავრა მოსკოვის კონსერვატორია. 1940 წლიდან ხელმძღვანელობდა სხვადასხვა თვითმოქმედ საგუნდო კოლექტივს აფხაზეთში. 1957-1971 წლებში, ხანგამოშვებით, იყო აფხაზეთის ხალხური სიმღერისა და ცეკვის სახელმწიფო ანსამბლის სამხატვრო ხელმძღვანელი, 1971–72 წლებში — აფხაზეთის სახელმწიფო საგუნდო კაპელის სამხატვრო ხელმძღვანელი და მთავარი დირიჟორი, 1972 წლიდან — აფხაზეთის სახელმწიფო ფილარმონიის სამხატვრო ხელმძღვანელი და სამხატვრო საბჭოს თავმჯდომარე. შექმნილი აქვს უვერტიურა, სიმფონიები, კანტატა და სხვა. ჩაწერილი აქვს მის მიერ შესრულებული 120-ზე მეტი ხალხური სიმღერა. დაჯილდოებული იყო დიმიტრი გულიას სახელობის პრემიით (1974).

ჯილდოები და აღიარება

• 1956 — საქართველოს დამსახურებული არტისტი
• 1958 — საქართველოს სსრ ხელოვნების დამსახურებული მოღვაწე
• 1970 — აფხაზეთის ასსრ ხელოვნების დამსახურებული მოღვაწე
• 1974 — დიმიტრი გულიას სახელობის პრემია
• 1984 — აფხაზეთის ასსრ სახალხო არტისტი
• 1988 — საქართველოს სახალხო არტისტი

ლიტერატურა

• ცარგუში ვ., ენციკლოპედია „საქართველო“, ტ. 2, თბ., 2012.

რესურსები ინტერნეტში

• რაჟდენ გუმბა — საქართველოს ბიოგრაფიული ლექსიკონი