ჩაისებრნი

ჩაისებრნი
	; ჩაი (Camellia sinensis)
მეცნიერული კლასიფიკაცია
სამეფო:	მცენარეები
განყოფილება:	ყვავილოვნები
კლასი:	ორლებნიანები
რიგი:	მანანასნაირნი
ოჯახი:	ჩაისებრნი
ლათინური სახელი
	Theaceae ; Mirb. ex Ker Gawl. (1816), nom. cons.
სინონიმები
	Camelliaceae DC.; Malachodendraceae J.Agardh, nom. illeg.;
ITIS	21371
NCBI	27065
EOL	4446
IPNI	30000791-2
FW	54709

ჩაისებრნი (ლათ. Theaceae) — ორლებნიან მცენარეთა ოჯახი. მარადმწვანე, იშვიათად ფოთოლმცვივანი, მცირე ან საშუალო ზომის ხეები და ბუჩქებია. მთლიანი, ჩვეულებრივ ტყავისებრი, მორიგეობით განლაგებული ფოთლები აქვთ. მათი ორსქესიანი ყვავილები (თეთრი, ვარდისფერი, წითელი, ყვითელი) უმეტესად მარტოული და დიდია.

სხვადასხვა მონაცემებით ოჯახში განსხვავებული რაოდენობის გვარი და სახეობა შედის (30-მდე გვარის 550-ზე მეტი სახეობა^[1], 15 გვარის 370 სახეობა^[2], 9 გვარი^[3] და სხვ.). გავრცელებულია ტროპიკულ, სუბტროპიკულ და ნაწილობრივ ზომიერ სარტყელში (ჩრდილოეთი ამერიკა, აღმოსავლეთი აზია).

გეოლოგიურ წარსულში ჩაისებრთა არეალი კოლხეთსაც მოიცავდა. იმერეთის მიოცენურ, ასევე აფხაზეთისა და გურიის პლიოცენურ ნალექებში ნაპოვნია ჩაისებრთა ფოთლის ანაბეჭდები (Camellia, Franklinia, Schima, Ternstroemia). დასავლეთ საქართველოში გაშენებულია ჩაი, ბათუმისა და სოხუმის ბოტანიკურ ბაღებში ხარობს კამელია, Sturtia, Eurya, Ternstroemia.