სოსიკო მერკვილაძე

სოსიკო (იოსებ) მერკვილაძე (დ. 1854, ჭალატყე, ზესტაფონის მუნიციპალიტეტი — გ. 1934, თბილისი) — ქართველი საზოგადო მოღვაწე და ფოლკლორისტი.

დაიბადა სოფ. ჭალატყეში (ამჟ. ზესტაფონის მუნიციპალიტეტი) 1854 წელს. დააარსა გამომცემლობა „ცოდნა“ და გახსნა ამავე სახელწოდების საკუთარი წიგნების მაღაზია თბილისში ქაშვეთის ტაძრის მახლობლად. გაზ. „სავაჭრო გზის“ რედაქტორ-გამომცემელი (1908 წ.). აგროვებდა ხალხური ზეპირსიტყვიერების ნიმუშებს და აქვეყნებდა ჟურნალ „აკაკის კრებულში“, გაზეთებში: „თეატრონსა“ და „ივერიაში“. ცალკე წიგნებად გამოსცა „ხალხური ანდაზები და გამოცანები“ 1898 წელს, „ხალხური აბრამისა და იობის ლექსი“ 1898 და 1903 წლებში, ქართული ზღაპრების 2 კრებული 1902 წელს, „ხალხური ვეფხისტყაოსანი“ 1905 წელს. სოსიკო მერკვილაძეს ჰქონდა საკუთარი სტამბაც, სადაც დაიბეჭდა არაერთი ნიმუში ქართველი კლასიკოსების შემოქმედებიდან.

სოსიკოს ლიტერატურულ-საგამომცემლო საქმიანობის გარდა, აკაკი წერეთელთან აკავშირებდა ახლო მეგობრობაც. მათ ერთად იმოგზაურეს რაჭა-ლეჩხუმში, რისი ამსახველი რამდენიმე ფოტო შემორჩა კიდეც ისტორიას.

სოსიკო მერკვილაძე გარდაიცვალა 1934 წელს თბილისში.

ლიტერატურა

• ქართული საბჭოთა ენციკლოპედია, ტ. 6, თბ., 1983. — გვ. 589.