რეა

რეას მიაქვს კრონოსთან ჩვარში გახვეული ქვა

რეა — დედა ღმერთქალი ურანოსისა და გეას ქალიშვილი. კრონოსის და და ცოლი. იგი ითვლება „ოლიმპიელი ღმერთების დედად", რადგან მან შვა ჰესტია, დემეტრე, ჰერა, ჰადესი, პოსეიდონი და ზევსი. გეამ კრონოს უწინასწარმეტყველა: „შენც შენი შვილი დაგამხობსო“, ამიტომ მან ახალშობილი შვილები გადაყლაპა,რომ თავისი ბატონობა უზრუნველყო.ასე შთანთქა ყველანი ზევსის გარდა, რომელიც რეამ ცბიერებით იხსნა: ურანოსის და გეას რჩევით კუნძულ კრეტაზე ლიქტოსსთან გააჩინა. მან კრონოს შვილის ნაცვლად ჩვრებში გახვეული ქვა შეუგდო პირში, ყრმა კი გადამალა იდას მთაგრეხილზე, დიქტეს გამოქვაბულში, სადაც თხა ამალთეა კვებავდა, კურეტები იცავდნენ, ნიმფები უვლიდნენ. მერე ზევსმა ტიტანომაქია ატეხა. დაამხო კრონოსი და გეას შემწეობით თუ მეტისის დახმარებით აიძულა ჩაყლაპული შვილები უკანვე ამოენთხია. ამიერიდან ის შებოჭილი წევს ქვესკნელში სხვა ტიტანებთან ერთად, ან ნეტართა კუნძულზე მსაჯულობს, რადამანთისთან ერთად, როგორც ჰესიოდე და პინდარე ვარაუდობენ.

რეამ ასევე ფრიგიაში განკურნა დიონისე და სამღვდლო სამოსი სტოლა გადასცა. იგი ითვლება ტიტანების დედოფალ ტიტანიდად.რეას უძველეს საკულტო ადგიდად ითვლებოდა კრეტა, სადაც გადმოცემის თანახმად, ერთ–ერთ გამოქვაბულში შვა და აღზარდა ზევსი.

რეას კულტი ადრეულ ხანაშივე შეერთო მცირეაზიული ღვთაების, კიბელეს კულტს. რეა-კიბელეს თაყვანისცემას ორგიასტული ხასიათი ჰქონდა.ძვ. წ. III საუკუნიდან ეს კულტი რომმაც მიიღო. რეა-კიბელეს წმინდა მცენარეებად ითვლებოდა მუხა და ფიჭვი, ცხოველად – ლომი. ჩვეულებრივ, რეა-კიბელეს წარმოსახავდნენ ეტლზე აღზევებულს, რომელსაც ლომები მიაქროლებდნენ. ქალღმერთს თავზე დიადემა ედგა, ხოლო ხელთ ტიმპანონი ეპყრა.

ბერძნულ რელიგიაში პირადად რეას არ უგებდნენ ტაძრებს, მას თაყვანს სცემდნენ კრონოსთან ან ზევსთან ერთად.

ათენში რეასა და მისი მეუღლის პატივსადებად იმართებოდა ზეიმი, რომელსაც კრონიები ეწოდებოდა. რომში რეას კულტი შეერთო ქალღმერთ ოპსისა და მისი მეუღლის, სატურნუსის კულტს, ხოლო მათ პატივსადებ ზეიმს სატურნალიებად უხმობდნენ.

რესურსები ინტერნეტში

• რეა
• რეა

ლიტერატურა

ვიკისაწყობში არის გვერდი თემაზე:

რეა

• Apolodoro de Atenas: Biblioteca mitológica, I, 1 - 5 (Urano se deshace de sus primeros hijos, y Gea persuade a los siguientes de que lo derroquen).
• I, 1 - 7: texto francés, con índice electrónico.