ვლადიმერ ახმეტელი

ვლადიმერ (ლადო) ახმეტელი (დ. 10 მარტი, 1875 – გ. 12 აგვისტო, 1942) — ქართველი პოლიტიკური და საზოგადო მოღვაწე, მწერალი, ჟურნალისტი.

დაიბადა კახეთში, სოფელ ანაგაში, დეკანოზ გიორგი ახმეტელაშვილის ოჯახში. სწავლობდა თელავის სასულიერო სკოლასა და თბილისის სემინარიაში, შემდეგ ლაიფციგის უმაღლეს სავაჭრო სკოლაში (1898–1901), ლაიფციგისა და ჰალეს უნივერსიტეტებში (1901-1904). 1904 წელს ჰალეს უნივერსიტეტში დაიცვა სადოქტორო დისერტაცია თემაზე: „საქართველოს საშინაო ვაჭრობა“ (Der Hausierhandel in Georgien). საქართველოში დაბრუნების შემდეგ აქვეყნებდა პრესაში წერილებს ეკონომიკაზე, გერმანიის სოციალ-დემოკრატიისა და მუშათა მოძრაობის შესახებ („შვარცის“ ფსევდონიმით). 1918 წლის მაისში დაინიშნა საქართველოს დემოკრატიული რესპუბლიკის ელჩად გერმანიაში. ბერლინში საქართველოს საელჩო ახმეტელის თაოსნობით გახდა ქართული კულტურის ცენტრი გერმანიაში. საქართველოს საბჭოთა ოკუპაციის შემდეგ, 1922 წლის გერმანია-საბჭოთა რუსეთის შეთანხმებით საქართველოს საელჩო გაუქმდა. ახმეტელი გახდა ბერლინის ქართული სათვისტომოს წევრი და იბრძოდა საქართველოს საკითხისადმი ევროპელთა ყურადღების მიპყრობისათვის. 1938 წლიდან ხელმძღვანელობდა გერმანიის მთავრობის მიერ შექმნილ „კავკასიის სამმართველოს“. გარდაიცვალა ბერლინში; დაკრძალულია იქვე.

რესურსები ინტერნეტში

• ქართველები უცხოეთში: ვლადიმერ ახმეტელი. საქართველოს პარლამენტის ეროვნული ბიბლიოთეკა.