ერითროციტები

ადამიანის ერითროციტები

ერითროციტები (ბერძნ. ἐρυθρός — წითელი და κύτος — უჯრედი, სათავსი), ასევე ცნობილი სახელწოდებით სისხლის წითელი უჯრედები — ადამიანის, ხერხემლიანი ცხოველებისა და ზოგიერთი უხერხემლოების სისხლის უჯრედები. ერითროციტების შემადგენლობაში შედის ცილოვანი ნივთიერება ჰემოგლობინი, რომელიც განსაზღვრავს სისხლის წითელ ფერს. ერითროციტების რაოდენობა 1მმ კუბში 4.5-5 მილიონია.

ფუნქცია

ერითროციტების მთავარ ფუქნციად ითვლება ჟანგბადის გადატანა ფილტვებიდან ორგანიზმის ქსოვილებში და ნახშირორჟანგის უკუმიმართულებით გამოყვანა. თუმცა, სუნთქვის პროცესში მონაწილეობის გარდა, ისინი ასრულებენ შემდეგ ფუნქციებსაც:

• გარემოს მჟავე-ტუტოვანი ბალანსის რეგულირება;
• სისხლისა და ქსოვილების იზოტონიის მხარდაჭერა;
• სისხლის პლაზმიდან ამინომჟავების, ლიპიდების ადსორბცია და მათი ქსოვილებში გადატანა.