Via Sacra

Via Sacra, იგივე წმინდა გზა — ძველი რომის მთავარი ქუჩა, რომელიც გადიოდა კაპიტოლიუმის ბორცვიდან, ფორუმის ზოგიერთი უმნიშვნელოვანესი რელიგიური ადგილის გავლით კოლოსეუმამდე.

გზა იყო რომაული ტრიუმფის ტრადიციული მარშრუტის ნაწილი, რომელიც იწყებოდა ქალაქის გარეუბნებში და გრძელდებოდა რომაული ფორუმის გავლით. მოგვიანებით მოკირწყლეს. ნერონის მმართველობის დროს მას კოლონადები გასდევდა.

გზა იყო რომის ისტორიის მრავალი საქმისა და უკეთურობის ადგილი, საზეიმო რელიგიური დღესასწაულების, გამარჯვებული გენერლების დიდებული ტრიუმფების და ბაზილიკებში ყოველდღიურად შეკრებილი ხალხის ადგილი, სადაც საუბრობდნენ, კამათელს აგორებდნენ, ბიზნესს აწარმოებდნენ ან სამართლიანობას ეძებდნენ. ქუჩის გასწვრივ ბევრი მეძავიც იდგა, პოტენციური კლიენტების ძებნაში. ავგუსტუსის მმართველობიდან, ვია-საკრა მნიშვნელოვან როლს ასრულებდა აპოთეოზის ცერემონიაში, რომლის მეშვეობითაც გარდაცვლილი რომაელი იმპერატორები ოფიციალურად გაღმერთდებოდნენ. იმპერატორის სხეული, დაფარული ცვილის სიკვდილის ნიღბით, გადაჰქონდათ სარეცელზე პალატინის ბორცვიდან ვია-საკრას გავლით ფორუმამდე, სადაც იმართებოდა სამგლოვიარო გამოსვლები, სანამ რაინდებისა და სენატორების პროცესია განაგრძობდა გზას მარსის ველისაკენ.

ლიტერატურა

• Filippo Coarelli (2014). Rome and Environs. University of California Press, გვ. 81–82. 
• L. Richardson, jr (October 1992). A New Topographical Dictionary of Ancient Rome: Sacra Via. JHU Press. ISBN 9780801843006. 

რესურსები ინტერნეტში

• Lucentini, M. (31 December 2012). The Rome Guide: Step by Step through History's Greatest City. Interlink. ISBN 9781623710088.