ჯაყისმანის მონასტერი

**ჯაყისმანის მონასტერი**
	ჯაყისმანის მონასტერი
	ლაშა ხაჩიძის ფოტო;
ძირითადი ინფორმაცია
გეოგრაფიული კოორდინატები	41°31′15″ ჩ. გ. 42°49′27″ ა. გ. / 41.5209333° ჩ. გ. 42.8242972° ა. გ.
რელიგიური კუთვნილება	საქართველოს მართლმადიდებელი ეკლესია
ქვეყანა	საქართველო
სასულიერო სტატუსი	მოქმედი
ხუროთმოძღვრების აღწერა
დეტალები

ჯაყისმანის მონასტერი — ისტორიულ სამცხეში, ქალაქ ვალედან ოციოდე კმ-ის მოშორებით სამხრეთის მიმართულებით, საქართველო-თურქეთის სასაზღვრო ზონაში. ძეგლთან მიღწევა საკონტროლო პუნქტის გავლით არის შესაძლებელი. უახლოესი დასახლებული პუნქტი 9 კმ-ის მოშორებით სოფელი წყალთბილაა. სამანქანო გზა პრაქტიკულად არ არსებობს. მონასტერი დაახლოებით ორი წელია რაც მოქმედია და მასში, წინამძღვრის გარდა, რვა მორჩილი ცხოვრობს. მთავარი ტაძარი აღდგომის სახელობისაა^[1].

ძეგლის აღწერა

ეკლესია დარბაზული ტიპისაა და განეკუთვნება X-XI საუკუნეებს. იგი თავისი მხატვრული ღირებულებით სამცხე-ჯავახეთის მხარის დარბაზულ ეკლესიებს შორის გამოირჩევა. მისი სამშენებლო ტექნიკის მაღალი დონე, კედლის წყობა, ფაქიზად თლილი ქვებით მოპირკეთება როგორც ინტერიერში, ასევე ექსტერიერში, თაღების, პილასტრების, კაპიტელების ნატიფი ფორმები ამ ძეგლს X-XI საუკუნეების ქართული - განსაკუთრებით, ჯავახეთისა და ტაო-კლარჯეთის ხუროთმოძღვრების ნიმუშებთან აახლოებს^[2].

ჯაყისმანის სამონასტრო კომპლექსი შემდეგი ნაგებობებისგან შედგება: მთავარი დარბაზული ეკლესია, რომელსაც ჩრდილოეთიდან ორი მცირე სამლოცველო (მათგან ერთი, შესაძლოა, პასტოფორიის ფუნქციას ასრულებდა) აკრავს, ხოლო დასავლეთიდან - ნართექსის ნაშთები. კომპლექსში შემავალი ნაგებობები ფერდობზე, ძველი ნასოფლარის ტერიტორიაზე ხელოვნურად მოსწორებულ ბაქანზეა განლაგებული. ფერდობი ფოცხოვის ხეობას გადაყურებს^[1].

მონასტრის ახლოს, ფოცხოვის ხეობაში, თურქეთის ტერიტორიაზე მდებარეობს შუა საუკუნეების ციხე - ჯაყის ციხე, რომელიც ჯაყელთა საგვარეულოს ეკუთვნოდა. სავარაუდოდ, ჯაყისმანი ჯაყისუბნის ტოპონიმიდან მოდის და დამახასიათებელია ტერიტორიისთვის, რომელიც ისტორიულად ჯაყის სახელს ატარებდა და მსხვილი ფეოდალების, ჯაყელების, სამფლობელოს ნაწილს წარმოადგენდა^[2].

საქართველოს პრეზიდენტის ბრძანებულების თანახმად მონასტერს 2006 წელს მიენიჭა ეროვნული მნიშვნელობის კულტურის უძრავი ძეგლის კატეგორია^[3].

გალერეა

ჯაყისმანის მონასტრი
ლაშა ხაჩიძის ფოტო
ჯაყისმანის მონასტრი
ლაშა ხაჩიძის ფოტო
ჯაყისმანის მონასტრი
ლაშა ხაჩიძის ფოტო

იხილეთ აგრეთვე

ჯაყის ციხე

ლიტერატურა

ბოჭორიძე გ., მოგზაურობა სამცხე-ჯავახეთში, თბ.,1992
თოთიბაძე ვ., ჯაყისმანის (ჯაყისუბნის) სამონასტრო კომპლექსი, ძეგლის მეგობარი. 1984, N 67.
სილაგაძე ნ., ჯაყისმანის მონასტერი, თბ., 2011

სქოლიო

[GHN-1] 1.0 ^1.1 ნიკოლოზ ვაჩეიშვილი ჯაყისმანის სამონასტრო კომპლექსს მოინახულებს

[სააგენტო-2] 2.0 ^2.1 საქართველოს კულტურული მემკვიდრეობის დაცვის სააგენტო

[3] საქართველოს პრეზიდენტის ბრძანებულება № 665, 2006 წლის 7 ნოემბერი, ქ. თბილისი, კულტურის ზოგიერთი უძრავი ძეგლისათვის ეროვნული მნიშვნელობის კატეგორიის მინიჭების შესახებ

[1]

[2]

[3]