ხუან მანუელ ფრუტოსი

ხუან მანუელ ფრუტოსი
ესპ. Juan Manuel Frutos Escurra
დაბადების თარიღი	12 ივნისი, 1879(1879-06-12)
დაბადების ადგილი	ასუნსიონი
გარდაცვალების თარიღი	15 აპრილი, 1960(1960-04-15) (80 წლის)
გარდაცვალების ადგილი	ასუნსიონი
მოქალაქეობა	პარაგვაი
განათლება	Universidad Nacional de Asunción
ხუან მანუელ ფრუტოსი ვიკისაწყობში

ხუან მანუელ ფრუტოსი (დ. 12 ივნისი, 1879 — გ. 15 აპრილი, 1960) — პარაგვაელი იურისტი და პოლიტიკოსი, რომელიც პარაგვაის 36-ე პრეზიდენტის მოვალეობას დროებით ასრულებდა 1948 წლის 3 ივნისიდან 15 აგვისტომდე. როგორც იუსტიციის უზენაესი სასამართლოს პრეზიდენტმა, მან პარაგვაის დროებითი პრეზიდენტის თანამდებობა იხინიო მორინიგოს გადადგომის შემდეგ დაიკავა.

ადრეული ცხოვრება და განათლება

ფრუტოსი დაიბადა ასუნსიონში 1879 წლის 12 ივნისს. მისი მშობლები იყვნენ ხოსე დოლორეს ფრუტოსი და ხულიანა ესკურა, ყოფილი პრეზიდენტის, პოლკოვნიკ ხუან ანტონიო ესკურას და. 1895 წელს იგი მიიღეს დედაქალაქის ეროვნულ სკოლაში, სადაც მისი მასწავლებლები იყვნენ მანუელ დომინგესი, მანუელ ფრანკო და მანუელ გონდრა.

მან სკოლა დაამთავრა 1901 წლის 1 მარტს. 1903 წელს ასუნსიონის ეროვნულ უნივერსიტეტში სამართლისა და სოციალური მეცნიერებების შესწავლა დაიწყო. 1912 წელს მან მიიღო დოქტორის ხარისხი; მისი სადისერტაციო თემა იყო „ქონების შენარჩუნების აკრძალვა“. სწავლის პარალელურად იგი იყო საზოგადოებრივი სამუშაოების კომისიის მდივანი, დედაქალაქის ეროვნული სკოლის მასწავლებელი და ფისკალური აგენტი სამოქალაქო საკითხებში. იმავე წელს მან ჩამოაყალიბა ეროვნული გვარდიის მე-7 ბატალიონი, რომლის მეთაურიც მოგვიანებით თავად გახდა.

ის ხელმძღვანელობდა რამდენიმე გაზეთს და წერდა პოლიტიკაზე. გარკვეული პერიოდის განმავლობაში ის გადასახლებული იყო არგენტინაში, კორიენტესში, საიდანაც წერდა გამოცემისთვის ¡Luchad! („იბრძოლეთ!“). ის ჟურნალისტად მუშაობდა გამოცემებში: General Caballero, El Sufragio და El Colegiado, რის გამოც რამდენჯერმე დაექვემდებარა რეპრესიებს და ციხეშიც კი მოხვდა.

მისი მმართველობა

მას შემდეგ, რაც პრეზიდენტ იხინიო მორინიგოს მთავრობა დაემხო იმ შიშით, რომ ის ძალის გამოყენებით შეეცდებოდა უფლებამოსილების ვადის გახანგრძლივებას, საკანონმდებლო ასამბლეა შეიკრიბა და მის მემკვიდრედ ფრუტოსი დანიშნა. მან პრეზიდენტის თანამდებობა 1948 წლის 3 ივნისს დაიკავა და ამ თანამდებობაზე 1948 წლის 15 აგვისტომდე დარჩა, ვიდრე ნატალისიო გონსალესი გახდებოდა პრეზიდენტი. ფრუტოსის მმართველობა ორ თვესა და თორმეტ დღეს გაგრძელდა.

თავისი მმართველობის პერიოდში მან 16 აგვისტო „პარაგვაელი ბავშვების დღედ“ გამოაცხადა, პრეზიდენტის საინფორმაციო სამსახურის დირექტორის, პროფესორ ანდრეს აგირეს წინადადებით. 1948 წლის 13 აგვისტოს შეიქმნა იუსტიციისა და შრომის სამინისტრო.

პირადი ცხოვრება

ხუან მანუელ ფრუტოსი სამჯერ იყო დაქორწინებული და სულ თექვსმეტი შვილი ჰყავდა, მათ შორის მუსიკოსი ხუან მანუელ ფრუტოს პანე და პოლიტიკოსი ხუან მანუელ ფრუტოს ფლეიტასი. იგი გარდაიცვალა ასუნსიონში 1960 წლის 15 აპრილს.

იხილეთ აგრეთვე

• პარაგვაის პრეზიდენტი