ხატების მუზეუმი (მაინის ფრანკფურტი)

ხატების მუზეუმი მაინის ფრანკფურტში გერმ. Das Ikonen-Museum
მდებარეობა	მაინის ფრანკფურტი
გახსნის თარიღი	1990

ხატების მუზეუმი (გერმ. Das Ikonen-Museum, ასევე Ikonenmuseum Stiftung Dr. Schmidt-Voigt) — მართლმადიდებელი ქრისტიანობის სიწმინდეთა ხელოვნების მუზეუმი მაინის ფრანკფურტში. იგი მდებარეობს ტევტონთა ორდენის სასახლის ბაროკოს შენობაში და წარმოადგენს მუზეუმების სანაპიროს აღმოსავლეთ დაბოლოებას. იგი დაკავშირებულია გამოყენებითი ხელოვნების მუზეუმთან.

ისტორია

1988 წელს კონიგშტაინელმა ექიმმა, იორგენ შმიდტ-ვოიგტმა, ქალაქ ფრანკფურტს კოლექცია გადასცა, რომელიც 800 ხატისგან შედგებოდა. „საჩუქარი გაკეთდა იმ პირობით, რომ ქალაქი უზრუნველყოფდა სივრცეს, სადაც გამოიფინებოდა კოლექცია და მოაწყობდა გამოფენებს, რომლებიც მიეძღვნებოდა მართლმადიდებელი ქრისტიანობის რელიგიური თემატიკის ხატწერას“. შემდეგ დაიწყო დიდებული შენობის სატრაპეზოს ინტერიერის მუზეუმად გადაკეთება. პროექტი შეიმუშავა არქიტექტორმა ოსვალდ მატიას უნგერსმა. XVI-XIX საუკუნეების კოლექცია თანდათან გაიზარდა 1000-ზე მეტ ექსპონატამდე შესყიდვების, ნათხოვრობისა და შემოწირულობების მეშვეობით. 1999 წელს ხატების მუზეუმმა დამატებით 82 პოსტბიზანტიური ხატი ინათხოვრა განუსაზღვრელი ვადით ბერლინის ბიზანტიური ხელოვნების მუზეუმის ხატების კოლექციიდან. კოლექციის საოცარი და განსაკუთრებული დანამატია ეთიოპიური ხატების, ჯვრების, ხელნაწერების და ლიტურგიული ნივთების კოლექცია, რომელიც კერძო სესხის სახითაა მიღებული. 2020 წლიდან დაწყებული, 2021 წლისთვის საგამოფენო არქიტექტურა და გამოფენის შემადგენლობა ფუნდამენტურად გადაიხედა.

მუდმივი ექსპოზიცია

2021 წლის გაზაფხულზე დასრულებული რეკონსტრუქციის მეშვეობით, საგამოფენო სივრცე გაფართოვდა ფოიეს ჩართვის ხარჯზე, რომელიც ახლა მუდმივი გამოფენისთვის ამოსავალი წერტილია, როგორც სივრცითი, ისე შინაარსობრივი თვალსაზრისით. ამ შესასვლელ დონეს მოსდევს მთავარი ოთახი, რომელიც უპირველეს ყოვლისა ეძღვნება ხატების გამოჩენას საეკლესიო კონტექსტში. მთავარი ოთახის გალერეაში გამოსახულია ხატების მნიშვნელობა კერძო, საყოფაცხოვრებო სფეროში. ეთიოპიის კაბინეტი ერთადერთი გამოფენაა მართლმადიდებელი ქრისტიანობის შესახებ გერმანიაში.

სპეციალური გამოფენები 2002 წლიდან

მუზეუმს მოწყობილი აქვს სპეციალური გამოფენები: „ქრისტიანული აღმოსავლეთის ბრწყინვალება“ (2002; ხატები სირიიდან და ლიბანიდან. ფრანკფურტის საკათედრო ტაძრის მუზეუმთან თანამშრომლობით. შემდეგ გამოფენა აჩვენეს პარიზში), „დიდი ნოვგოროდი“ (2003; ფრანკფურტის წიგნის ბაზრობაზე. XIV-XIX საუკუნეების ხატები, საეკლესიო ჭურჭელი და სამკაულები მდიდრული სავაჭრო ქალაქ ნოვგოროდიდან. ფრანკფურტის საკათედრო ტაძრის მუზეუმთან თანამშრომლობით), „…შენი მსახურის ხელით…“ (2004; არაბული სამყაროს ქრისტიანული ხატები. ხატები სირიიდან, ლიბანიდან, და ეგვიპტიდან), „ფეხბურთი და რელიგია“ (2006; გამოფენა 2006 წლის მსოფლიო ჩემპიონატისთვის გერმანიაში), „ცეცხლი და სული“ (2008; ხატები ბულგარეთის საპატრიარქოდან), „700 წელი ტევტონთა ორდენის ეკლესიის ფრანკფურტში“ (2009; გამოფენა ტევტონთა ორდენის ეკლესიასა და ტევტონთა ორდენზე), „უცნობი რუსეთი“ (2010; ხელმოწერილი და დათარიღებული ხატები ძველი მორწმუნეების სახელოსნოებიდან), „სიწმინდის ფერები“ (2013; XV-XIX საუკუნეების ხატები, მოსკოვის ანდრეი რუბლიოვის მუზეუმიდან), „ზამთრის წმინდანები“ (2013-2014; წმინდანთა წარმოდგენები და მოთხრობები. ფრანკფურტის საკათედრო ტაძრის მუზეუმთან და კამპენის ხატების მუზეუმთან თანამშრომლობით), „ხატების მუზეუმისა და მისი მეგობრების 25 წელი“ (2015; ფრანკფურტის ხატების მუზეუმის 25 წლის იუბილეზე), „კრაკოვის საშობაო შობის სცენები“ (2016-2017) და სხვა.

რესურსები ინტერნეტში

ვიკისაწყობში არის გვერდი თემაზე:

ხატების მუზეუმი (მაინის ფრანკფურტი)

• ხატების მუზეუმის საიტი