მასალა ვიკიპედიიდან — თავისუფალი ენციკლოპედია
შუპყა[1] (ლათ. Heracleum asperum) — ორ- ან მრავალწლოვანი ბალახოვანი მცენარე ქოლგოსანთა ოჯახისა. სიმაღლეში 100–150 სმ-ია. ღეროს ღრმა ღარები ჩასდევს, ჩვეულებრივ, სქლად არის მოფენილი ხორკლიანი ბეწვით. აქვს სამფოთოლაკიანი ან ფრთართული ფოთლები, სეგმენტები კვერცხისებური ან მოგრძო-კვერცხისებურია. ქოლგები დიდი ზომისაა, მრავალსხივიანი, ხორკლიანი ბეწვით შებუსული. ყვავილები თეთრია. ყვავის და ნაყოფმსხმოიარობს მარტ-სექტემბერში. კავკასიის ენდემური მცენარეა. საქართველოში გვხვდება შიდა ქართლში, მთიულეთში, ფშავში, ხევსურეთსა და კახეთში. იზრდება ტყის ზედა და სუბალპურ სარტყელში — მაღალ ბალახეულობაში, ტყისპირა ადგილებში, ველობებსა და სუბალპურ მდელოებზე.[2]
