ქალასშიგა ანევრიზმა

თავის ტვინის მარჯვენა შუა არტერიის ბიფურკაციის ანევრიზმა.

ქალასშიგა ანევრიზმა (ასევე ცნობილი, როგორც თავის ტვინის ანევრიზმა) — თავის ტვინის ვასკულარული დაავადება, რა დროსაც ადგილი აქვს სისხლძარღვის კედლის გამობერვას, გამომდინარე მისი დასუსტებიდან. თავის ტვინის ანევრიზმებს გასკდომამდე უმეტესად არ ახასიათებს კლინიკური გამოვლინებები, თუმცა, ზოგჯერ აღინიშნება თავის ტკივილი, მხედველობის დარღვევები და თავის ტვინის ნერვების დეფიციტის სიმპტომები. გასკდომის შემთხვევაში კი აღინიშნება სუბარაქნოიდული სისხლჩაქცევის კლინიკური გამოვლინებები: ცნობიერების დაკარგვა, თავის ტკივილი (პაციენტები ხშირად ახასიათებენ, როგორც "ცხოვრებაში ყველაზე საშინელ თავის ტკივილს"), გუგის პათოლოგიები, მენინგიზმი (მენინგიტისთვის დამახასიათებელი სიმპტომები მენინგიტის არარსებობისას) და ფოკალური ნევროლოგიური ნიშნები, გამომდინარე სისხლდენის მდებარეობიდან). დიაგნოზის დასმა ხდება რადიოლოგიური კვლევების (მაგნიტურ-რეზონანსული (MRA) ან კომპიუტერულ-ტომოგრაფიული ანგიოგრაფია (CTA)) საფუძველზე.

უკანა შემაერთებელი არტერიის ანევრიზმა. ანგიოგრაფია.

წინა შემაერთებელი არტერიის ანერიზმა. კომპიუტერულ-ტომოგრაფიული ანგიოგრამა.

ანევრიზმები არტერიის მიხედვით

თავის ტვინის შუა არტერიის ანევრიზმა

თავის ტვინის ანევრიზმებს შორი ერთ-ერთი ყველაზე ხშირია თავის ტვინის შუა არტერიის (ინგ. Middle cerebral artery (MCA)) ანევრიზმა. გარდა ზოგადი სიმპტომებისა (თავის ტკივილი, გულყრა), გასკდომამდე ზოგჯერ აღინიშნება თავბრუსხვევა (ვერტიგო) და სისუსტე სხეულის საპირისპირო ნახევარში. აღსანიშნავია, რომ MCA-ს ანევრიზმა ყველაზე ხშირად წარმოიქმნება მისი ბიფურკაციის (ორად გაყოფის) ადგილას.

თავის ტვინის უკანა შემაერთებელი არტერიის ანევრიზმა

უკანა შემაერთებელი არტერიის ანევრიზმა — თავის ტვინის უკანა შემაერთებელი არტერიის (ინგ. Posterior communicating artery (PComA)) ანევრიზმული წარმონაქმნი - ზოგჯერ ხასიათდება თავის ტვინის ნერვების (ძირითადად, მესამე და მეხუთე) დეფიციტის სიმპტომებით.

თავის ტვინის წინა შემაერთებელი არტერიის ანევრიზმა

ბაზილარული არტერიის თითისტარისებრი ანევრიზმა. კომპიუტერული ტომოგრაფია.

წინა შემაერთებელი არტერიის ანევრიზმა — თავის ტვინის წინა შემაერთებელი არტერიის (ინგ. Anterior communicating artery (AComA)) ანევრიზმული წარმონაქმნი. ანევრიზმის გასკდომამდე სიმპტომები უმეტესად არ ვლინდება, თუმცა, ზოგჯერ აღინიშნება თავის ტკივილი და მხედველობის დარღვევები.

ბაზილარული არტერიის თითისტარისებრი ანევრიზმა

ბაზილარული არტერიის თითისტარისებრი ანევრიზმა — თავის ტვინის ბაზილარული არტერიის (ინგ. Basilar artery (BA)) თითისტარის ფორმის ანევრიზმული გაგანიერება. აღსანიშნავია, რომ ქალასშიგა არტერიებს შორის თითისტარისებრ გაგანიერებას ყველაზე ხშირად განიცდის ბაზილარული არტერია. გასკდომამდე ანევრიზმა ხასიათდება თავის ტვინის ნერვების დეფიციტის სიმპტომებით.

ბაზილარული არტერიის პერფორატორის ანევრიზმა

ბაზილარული არტერიის პერფორატორის ანევრიზმა. თავის ტვინის ანგიოგრამა.

ბაზილარული არტერიის პერფორატორის ანევრიზმა (ინგ. BAPA - Basilar artery perforator aneurysm) — თავის ტვინის ბაზილარული არტერიის პერფორატორის ანევრიზმული წარმონაქმნი. ეს ანევრიზმები უმეტესად მცირე ზომისაა და, შესაბამისად, გასკდომამდე სიმპტომები ძირითადად არ ვლინდება.

რესურსები ინტერნეტში

• Auricchio AM, Di Bonaventura R, Marchese E, Della Pepa GM, Sturiale CL, Menna G, Skrap B, Olivi A, Albanese A. Navigating Complexity: A Comprehensive Approach to Middle Cerebral Artery Aneurysms. J Clin Med. 2024 Feb 24;13(5):1286. doi: 10.3390/jcm13051286. PMID: 38592120; PMCID: PMC10931706
• Surgical Management of Aneurysms of the Middle Cerebral Artery - Neupsykey
• Zelman S, Goebel MC, Manthey DE, Hawkins S. Large Posterior Communicating Artery Aneurysm: Initial Presentation with Reproducible Facial Pain Without Cranial Nerve Deficit. West J Emerg Med. 2016 Nov;17(6):808-810. doi: 10.5811/westjem.2016.8.30457. Epub 2016 Sep 29. PMID: 27833694; PMCID: PMC5102613
• Park JH, Park SK, Kim TH, Shin JJ, Shin HS, Hwang YS. Anterior communicating artery aneurysm related to visual symptoms. J Korean Neurosurg Soc. 2009 Sep;46(3):232-8. doi: 10.3340/jkns.2009.46.3.232. Epub 2009 Sep 30. PMID: 19844624; PMCID: PMC2764022.
• Jung YJ, Kim MS, Choi BY, Chang CH. Fusiform aneurysm on the basilar artery trunk treated with intra-aneurysmal embolization with parent vessel occlusion after complete preoperative occlusion test. J Korean Neurosurg Soc. 2013 Apr;53(4):235-40. doi: 10.3340/jkns.2013.53.4.235. Epub 2013 Apr 30. PMID: 23826480; PMCID: PMC3698234
• Fusiform intracranial aneurysm - Radiopaedia
• Satti SR, Vance AZ, Fowler D, et al. J NeuroIntervent Surg 2017;9:669–673.