ფრენა უკასროდ

„ფრენა უკასროდ“
(სახელმძღვანელო გერმანიაში წამსვლელთათვის)
„ფრენა უკასროდ“, ყდა, 2011
ავტორი	მიხო მოსულიშვილი
რედაქტორი	ბაკურ სულაკაური
ენა	ქართული
სერია	ახალი ქართული პროზა
თემა	ქართველი ემიგრანტების ცხოვრება გერმანიაში
ჟანრი	პოსტმოდერნისტული, პიკარესკული რომანი
გამომცემელი	„სულაკაური“, „გუმბათი-2007“
გამოცემის თარიღი	2001 და 2011
გვერდი	212
წინამორბედი	უჟამო ჟამის რაინდი, 1998
მომდევნო	ბენდელა (დოკუმენტური რომანი), 2003
ISBN	99928–914–2–4 და 978-9941-0-3160-1

ფრენა უკასროდ — ქართველი მწერლის, ლიტერატურული პრემია „გალას“ ლაურეატის, მიხო მოსულიშვილის თაღლითური, იგივე პიკარესკული რომანი, პოსტმოდერნისტულად ორგანიზებული, არასწორხაზოვანი თხრობით და ქალაქური ჟარგონის გამოყენებით.

სათაური

რომანის სათაური „ფრენა უკასროდ“ იოჰან ვოლფგანგ ფონ გოეთეს „ფაუსტის“ პერიფრაზია: დოქტორ ფაუსტს ცაში გასაფრენად აუერბახის სარდაფის ღვინის კასრი სჭირდებოდა, ჩვენს გმირებს კი ასეთივე გაფრენისთვის მარიხუანით შეკეთებული ამერიკული „ჯოინტიც“ ჰყოფნით.

თხრობა

რომანს საფუძვლად უდევს ქართველი ემიგრანტების ცხოვრება გერმანიასა და ევროპის სხვა ქვეყნებში. ავტორის ირონიული ხედვით გამორჩეული, ჟანრულად რთული და, მიუხედავად ამისა, წასაკითხად იოლი და ხალისიანი თხრობა, რომელითაც ნაწარმოები დაყოფილია არა "თავებად", არამედ "მოყოლილებად", ასახავს ქართველი ემიგრანტის ცხოვრებას გერმანიის ლტოლვილთა ბანაკებში.

შინაარსი

რომანის მოქმედება ხდება მეოცე და ოცდამეერთე საუკუნეების გასაყარზე. გერმანიაში მოგზაურობისას პერსონაჟები ხვდებიან თავიანთი დიდი ქართველი წინაპრების სულებს, რომლებიც ამავე ადგილებში მოღვაწეობდნენ (გრიგოლ რობაქიძე, კონსტანტინე გამსახურდია, დავით გურამიშვილი). ვაიმარში კი გოეთესა და შილერის სკულპტურები ცოცხლდებიან, რომანის გმირებს, ქართველ და ნიგერიელ ნარკო-ვაჭრებს ეკამათებიან, და იმავე კამათში მონაწილეობას იღებს ნიგერიელი ღმერთების მამამთავარი, ოლოკუნი.

საბოლოოდ, ინტერნაციონალური არამზადების ჯგუფის მოღვაწეობა მარცხით მთავრდება — რომანტიზირებულ ავაზაკობას წინ აღუდგება გერმანული სასამართლო მანქანა და „აზულიანტებს“ თავ-თავიანთ ქვეყნებში გააძევებენ. როგორც ირკვევა, არც გერმანიაა წარმოჩენილი რომანში იდეალურ სამყაროდ, ვინაიდან არამზადებს გერმანიაში თავიანთი შავ-ბნელი საქმეების თანამზრახველები ჰყავთ და, გარდა ამისა, არც დასავლური ცივილიზაციაა ისეთი რამ, რისი მორყევაც შეუძლებელია.

პერსონაჟები

წიგნის „ფრენა უკასროდ“ პირველი გამოცემის ყდა, სულაკაურის გამომცემლობა, 2001

• პუპა (პავლე) კოღუაშვილი
• დიტო (დიმიტრი) ქინქლაძე
• კახა ბურნაძე
• ბოზო ანჩიბუა ოდუდუვუა
• საფა ჩუკუ ჩუკუ
• ანანკე ორო კააიია
• მარიშკა „პალმით“
• ვილლი ზაბელიკუსი
• ოტტო ფონ ურიანი
• კრისტინ შვერდტლაინი

რომანის გამოცემები

• 2001 წ. — ბაკურ სულაკაურის გამომცემლობა.
• 2011 წ. — გამომცემლობა „გუმბათი-2007“
• 2012 წ. — ელექტრონული გამომცემლობა „ლითერასი“

რესურსები ინტერნეტში

• „ფრენა უკასროდ“ დაარქივებული 2017-12-20 საიტზე Wayback Machine.
• ანდრო ენუქიძე „როგორ დაფრინავენ გერმანიაში?“
• „ფრენა უკასროდ“ (კითხულობს ავტორი)