ჯაია

ჯაია

ჯაია (ინდონ. Jaya; ან პუნჩაკ-ჯაია) — მწვერვალი ინდონეზიაში, კუნძულ ახალი გვინეის დასავლეთ ნაწილში, სუდირმანის მთებში. ოკეანეთის უმაღლესი წერტილი. სიმაღლე 4884 მ. აგებულია ულტრაფუძე მაგმატური ქანებით. 4500 მ ზევით დაფარულია მარადი თოვლითა და მყინვარებით, რომელთა საერთო ფართობია დაახლოებით 15 კმ². გეოლოგიური თვალსაზრისით მდებარეობს ავსტრალიის ფილაქანის ფარგლებში. აღმოაჩინა ნიდერლანდელმა ზღვაოსანმა იან კარსტენსმა გემის ბორტიდან 1623 წელს. მოგვიანებით მწვერვალს მისი სახელი ეწოდა — კარსტენს-ტოპენი ანუ კარსტენსის მთა. 1965 წელს ინდონეზიის პრეზიდენტის აჰმედ სუკარნოს პატივსაცემად უწოდეს სუკარნო. 1969 წლიდან ეწოდება ჯაია, რაც ქართულ თარგმანში გამარჯვებას ნიშნავს. ზოგჯერ მწვერვალს უწოდებენ აგრეთვე კარსტენსის პირამიდას. პირველი ასვლა განხორციელდა 1962 წელს. მწვერვალის სიახლოვეს მდებარეობს მაღალმთიანი კარიერი გრასბერგი, საიდანაც მოიპოივებენ ოქროს, ვერცხლსა და სპილენსძს. პუნჩაკ-ჯაია შედის ლორენცის ეროვნული პარკის შემადგენლობაში.