ადოლფი (გერმანიის მეფე)

ადოლფი

ადოლფის სიკვდილის სცენა, ავტ. სიმონ კობლენცი 1829 წ.

ადოლფ ნასაუელი (გერმ. Adolf von Nassau) (გ. 2 ივნისი 1298) გერმანიის მეფე და საღვთო რომის იმპერატორი 1292 - 1298 წლებში.

გერმანიის მეფედ არჩევამდე ადოლფი იყო ნასაუს გრაფი, ცხოვრობდა ვაისბადენში და სხვა დიდებულებს ემსახურებოდა. იგი ლამაზი და ძლიერი მამაკაცი იყო, ძლიერი მეომარი, განთქმული პირდაპირობით და განათლებით.

ადოლფი ნასაუს გრაფი არჩეულ იქნა გერმანიის მეფედ 1292 წლის მაისში, გარდაცვლილი რუდოლფ Iს ნაცვლად. გერმანელ დიდებულებს იმედი ჰქონდათ რომ ადოლფი უფრო მორჩილი იქნებოდა ვიდრე რუდოლფ ჰაბსბურგი. იგი მართლაც ბევრს დაპირდა კენჭისყრამდე, მაგრამ არჩევის შემდეგ კურფურსტებისთვის სრულიად მოულოდნელად მოიქცა. იგი რუდოლფის მსგავსად ცდილობდა შეესყიდა მემკვიდრეობითი მამულები.

მან მოლაპარაკებები დაიწყო ინგლისის მეფე ედუარდ I-თან და დაპირდა საფრანგეთის წინააღმდეგ ომის დაწყებას, რისთვისაც 100 000 გირვანქა სტერლინგი მიიღო, მაგრამ ადოლფმა მოატყუა ინგლისის მეფე. ამ ფულით მან აღჭურვა ჯარი და 1294 წელს ჩაერია ტიურინგის ლანდგრაფისა და მისი პირველი ქორწინების შვილების ომში. ამ ომით ადოლფის მტრებმა ისარგებლეს და მის წინააღმდეგ გაილაშქრნენ. 1298 წლის თებერვალში გერმანელი დიდებულები ვენაში შეიკრიბნენ და ავსტრიის ჰერცოგ ალბერტთან მოილაპარაკნენ ადოლფის ჩამოგდებაზე. ადოლფსა და ალბერტს შორის ომი დაიწყო. ივნისში კურფიურსტები მაინცში შეიკრიბნენ და განაცხადეს რომ ართმევენ მეფეს ძალაუფლებას, და დაადანაშაულეს ადოლფი სამოქალაქო ომის გაჩაღებაში, ეკლესიის შეურაცხყოფაში და დიდებულთა უფლებების დარღვევაში. ახალ მეფედ ალბერტ ავსტრიელი გამოაცხადეს.

ალბერტი გელგეიმის მახლობლად გამაგრდა. 2 ივნისს, გამთენიისას ადოლფმა შეუტია ავსტრიელებს. ამ უკანასკნელებმა მოჩვენებით უკან დაიხიეს და მეფის ჯარები მხედრებისთვის არახელსაყრელ პოზიციაზე შეიტყუეს. გაჩაღდა ბრძოლა, ადოლფი ჯარისკაცებთან ერთად იბრძოლა და შუადღისკენ იგი მოკლეს.

ლიტერატურა

• Рыжов, K. (1999). Энциклопедия - Все монархи мира - Западная Европа. Вече, Москва.
• Gerlich, Alois (1994). „Adolf von Nassau (1292 - 1298) - Aufstieg und Sturz eines Königs, Herrscheramt und Kurfürstenfronde“. Nassauische Annalen (German). Wiesbaden. 105: 17–78.
• Even, Pierre (1998). „Das Bildnis König Adolfs von Nassau im Frankfurter Kaisersaal (The Portrait of King Adolf of Nassau in the Frankfurt Hall of Emperors)“. Nassauische Annalen (German). Wiesbaden. 109: 73–89.
• Herde, Peter (1995). "From Adolf of Nassau to Louis of Bavaria, 1292-1347," in (1995) რედ. Rosamond McKitterick, Timothy Reuter, David Abulafia, Michael Jones, and C. T. Allmand: The New Cambridge Medieval History - Volume 6: c.1300-c.1415. Cambridge University Press. ISBN 0-521-36290-3. 
• Jeep, John M. (2001). Medieval Germany: An Encyclopedia. Routledge, გვ. 928. ISBN 0-8240-7644-3. 

რესურსები ინტერნეტში

ვიკისაწყობში არის გვერდი თემაზე:

ადოლფი (გერმანიის მეფე)

• Bibliography of King Adolf of Nassau (1292-1298). (გერმანული).