სიმონ ნემანიშვილი
| სიმონ ნემანიშვილი | |
|---|---|
 | |
| დაბ. თარიღი | 12 თებერვალი, 1911 |
| დაბ. ადგილი | აბანოეთი |
| გარდ. თარიღი | 6 სექტემბერი, 1993 (82 წლის) |
| მოქალაქეობა |
 სსრკ საქართველო |
| საქმიანობა | გეოგრაფი |
| მუშაობის ადგილი | თბილისის სახელმწიფო უნივერსიტეტი |
| ალმა-მატერი | თბილისის სახელმწიფო უნივერსიტეტი |
| სამეცნიერო ხარისხი | მეცნიერებათა კანდიდატი |
სიმონ ნემანიშვილი (დ. 12 თებერვალი, 1911 — გ. 6 სექტემბერი, 1993) — ქართველი გეოგრაფი და პედაგოგი. გეოგრაფიულ მეცნიერებათა კანდიდატი (1954).
ბიოგრაფია[რედაქტირება | წყაროს რედაქტირება]
სიმონ ნემანიშვილმა დაამთავრა ქალაქ ონის პედაგოგიური ტექნიკუმი 1931 წელს; თბილისის სახელმწიფო უნივერსიტეტის გეოგრაფია-გეოლოგიის ფაკულტეტი გეოგრაფიის სპეციელობით 1939 წელს.[1]
1931 წელს დანიშნეს ონის რაიონის სოფელ ზვარეთის არასრული საშუალო სკოლის მასწავლებლად, 1933–34 წლებში — დირექტორად; 1939–41 წლებში მუშაობდა ქალაქ გორის გეოგრაფიის მეთოდკაბინეტის ხელმძღვანელად; 1941–46 წლებში იყო საბჭოთა არმიაში; 1946 წელს მუშაობა დაიწყო ქალაქ თბილისის 33-ე ქალთა საშუალო სკოლის სასწავლო ნაწილის გამგედ; 1948 წლიდან თბილისის სახელმწიფო უნივერსიტეტის გეომორფოლოგიის კათედრაზე დაიწყო მუშაობა; 1948–52 წლებში გაიარა ასპირანტურის კურსი ვახუშტი ბაგრატიონის სახელობის გეოგრაფიის ინსტიტუტში.[1]
1956 წლიდან მუშაობას იწყებს ვახუშტი ბაგრატიონის სახელობის გეოგრაფიის ინსტიტუტში. საკანდიდატო დისერტაცია დაიცვა 1954 წელს თემაზე: „ახალციხის ქვაბულის აღმოსავლეთ ნაწილის გეომორფოლოგიისათვის“. მის სადისერტაციო ნაშრომში პირველად იქნა გაშუქებული რელიეფწარმომშობი ფაქტორების თავისებურება; გამოყოფილ იქნა ეროზიულ-დენუდაციური ზედაპირების საფეხურები და მათი გეომორფოლოგიური დახასიათება და გავრცელება.[1]
სიმონ ნემანიშვილი ავტორია 60-მდე სამეცნიერო ნაშრომისა, რომელთაგანაც 50 გამოქვეყნებულია. ნაშრომების უმეტესი ნაწილი ეხება მდინარეთა და ზღვიური ტერასების მეცნიერულ გამოკვლევებს. ტერასების გავრცელების ზოგადი სურათი გადმოცემულია ქვეყნის გეოლოგიური და ფიზიკურ-გეოგრაფიული პირობების გათვალისწინების ფონზე. შეიმუშავა მდინარეული ტერასების გენეტური კლასიფიკაციის ორიგინალური, ოთხწევრიანი სქემა.[1]