ოტოს სამეცნიერო ენციკლოპედია
ოტოს სამეცნიერო ენციკლოპედია (ჩეხ. Ottova encyklopedie ან Ottův slovník naučný) — უდიდესი უნივერსალური ენციკლოპედია ჩეხურ ენაზე. გამოიცემოდა 1888—1909 წლებში. ენციკლოპედია დღემდე ინფორმაციის აქტუალურ წყაროდ რჩება მთელი რიგი მიმართულებებით (განსაკუთრებით ჩეხურ კულტურასა და ისტორიას აშუქებს). სახელი დაერქვა გამოცემის ინიციატორისა და გამომცემლის — ჩეხი საზოგადოებრივი მოღვაწისა და ბიბლიოფილის, იან ოტოს, გვარის მიხედვით. დერეკ სეიერი ჩეხეთის ისტორიის შესახებ დაწერილ თავის წიგნში ამ გამოცემას სამშობლოში შეუდარებელ ენციკლოპედიასა და ზოგადსაკაცობრიო თვალსაზრისით, ერთ-ერთ უდიდეს და უსრულყოფილეს ენციკლოპედიას უწოდებს, რომელიც მისი აზრით, მხოლოდ ბრიტანიკას თუ ჩამორჩება.
ენციკლოპედია 28 სქელტანიანი ტომისგან შედგება (27 ძირითადი და 1 დამატებითი ტომი; ზოგიერთი ტომის სისქე — ათას გვერდზე მეტია). სტატიათა საერთო რაოდენობა — დაახლოებით 186 ათასია, გვერდების საერთო რაოდენობა — 28912, მოიცავს 4888 ილუსტრაციასა და 479 გვერდს დამატებითი მასალებით. რედკოლეგია 55 მთავარი რედაქტორისა და 1100 ავტორისგან შედგებოდა, რომელთა შორისაც იმ დროის ჩეხეთის წამყვანი მეცნიერები ირიცხებიან. ენციკლოპედიის დამახასიათებელი ნიშანია მასალის სიღრმისეული დამუშავება: ზოგიერთი სტატია 10 გვერდამდეც კი აღწევს, ხოლო ავტორების აზრით, ყველაზე მნიშვნელოვანი თემების აღმწერი სტატიების გვერდების რაოდენობა 100 სცილდება.
1996 — 2003 წლებში ენციკლოპედია ხელახლა გამოიცა და მოკლე ხანში CD-ROM-ზეც გადაიტანეს ინფორმაცია. „ოტოს ენციკლოპედია“ სავაჭრო ნიშნად 1995 წლის 22 მაისს დაარეგისტრეს. ენციკლოპედიის სტატიები საზოგადო საკუთრებაშია.
იხილეთ აგრეთვე[რედაქტირება | წყაროს რედაქტირება]
რესურსები ინტერნეტში[რედაქტირება | წყაროს რედაქტირება]
- Ottův slovník naučný (1-27) free download in various formats
- Homepage of the CDROM edition of Otto's encyclopedia
- coto.je დაარქივებული 2008-09-10 საიტზე Wayback Machine. - "What Is It" - an online version of three Czech encyclopedias including Otto's (Czech only)