ნინო დარბაისელი

ნინო დარბაისელი
დაბადების თარიღი	8 მარტი, 1961(1961-03-08) (63 წლის)
დაბადების ადგილი	თბილისი, საქართველოს სსრ, სსრკ
საქმიანობა	პოეტი და მწერალი
მოქალაქეობა	სსრკ  საქართველო
ალმა-მატერი	თბილისის სახელმწიფო უნივერსიტეტი
Magnum opus	დიოტიმა
გავლენა მოახდინეს :::შოთა რუსთაველი, ვაჟა-ფშაველა, ილია ჭავჭავაძე, საფო, ოვიდიუსი და სილვია პლათი
საიტი	armuri.georgianforum.com/t34-topic

ნინო დარბაისელი სტრონი (დ. 8 მარტი, 1961, თბილისი) — ქართველი პოეტი, ლიტერატურატმცოდნე.

ბიოგრაფია

ნინო დარბაისელი სტრონი (Nino Darbaiseli Straughn) დაიბადა 1961 წლის 8 მარტს. დაამთავრა თბილისის სახელმწიფო უნივერსიტეტის ფილოლოგიის ფაკულტეტი. იბეჭდება 1974 წლიდან, მისი დებიუტი შედგა 1977 წელს ქართული პოეზიის ყოველწლიურ ანთოლოგიაში „პოეზიის დღე“.

საქართველოს მეცნიერებათა ეროვნული აკადემიის გამომცემლობა „მეცნიერების“ მთავარი რედაქტორი (1990-1995). საქართველოს კულტურულ ურთიერთობათა ცენტრ „კავკასიური სახლის" დირექტორის მოადგილე სამეცნიერო-საგამომცემლო დარგში (1994-1997). ფილოლოგიის დოქტორი: დისერტაცია თემაზე „ქართული ვერლიბრი" (1992).

1999 წლიდან დარბაისელი არის შოთა რუსთაველის ქართული ლიტერატურის ინსტიტუტის უფროსი მეცნიერი-თანამშრომელი. 2000 წლიდან მუშაობს „გალაკტიონის კვლევის ცენტრში". 2001 წლიდან ყოველწლიური სამეცნიერო პუბლიცისტური კრებულის „გალაკტიონოლოგიის" პასუხისმგებელი მდივანი.

შეყვანილია ცნობარში „Who is Who among World Business and Art Women" (2002). არის საქართველოს მწერალთა ნაციონალური კავშირის წევრი, ასევე შემოქმედებითი გაერთიანება „არილის“ წევრი.

ნინო დარბაისელი მეუღლესთან ერთად ცხოვრობს ნეშვილში (ტენესი, აშშ). არის ამერიკის პოეტთა აკადემიის ნამდვილი წევრი და ასევე, ამერიკის პენ ცენტრის პროფესიონალი წევრი.

წიგნები

• ვიტა ბრევის (ლექსები), თბ., სიტყვა, 2010 - ISBN 978-9941-9176-0-8
• დიოტიმა (ლექსები), თბ., მერანი, 2004 - ISBN: 99940-780-2-X
• დილისპირული (ლექსები), თბ., მერანი, 2002
• ჩემი სიყვარულის პწკარედი (ლექსები), თბ., მერანი, 1994
• ახალდედები (ლექსები), თბ., მერანი, 1987

პრემიები და ჯილდოები

• საქართველოს სახელმწიფო პრემია პუბლიცისტიკის დარგში, 2005
• ბეჟან ბარდაველიძის სახელობის პრემია (2000 ლარი) ჟურნალ „ცისკარი 1852“-ისა და ვახტანგ ბარდაველიძის საქველმოქმედო ფონდის ერთობლივ კონკურსში, 2020 წელს გამოქვეყნებული საუკეთესო ნაწარმოებისთვის (ნომინაცია „კრიტიკა-ესეისტიკა“), 2021

ქველმოქმედება

2021 წლის 12 თებერვალს ნინო დარბაისელმა ბეჟან ბარდაველიძის სახელობის პრემია, ორი ათასი ლარის ოდენობით, ჟურნალ „ცისკარი 1852“-ის რედაქციას გადასცა:

„ჩემთვის ცნობილია, რომ ჩემი დღევანდელი ჯილდო, გარდა სამახსოვრო პრიზისა და შესაბამისი დიპლომისა, გარკვეულ ფულად ჯილდოსაც ითვალისწინებს (2000 ლარი). ჩემი სურვილი და გადაწყვეტილება ასეთია და, იმედი მაქვს, რომ ამას გაითვალისწინებთ: ჩემს ნაცვლად იგი მთლიანად გადაეცეს ჟურნალ „ცისკრის“ რედაქციას და ამით ხელი შეეწყოს მუშაობაში, რამდენადაც ეს შესაძლებელია“

ცხოვრებისეული კრედო

„მე არ შემიძლია შევცვალო სამყარო უკეთესობისაკენ, სამაგიეროდ, რაღაც უნდა შევუმსუბუქო და გავათბო ჩემს გვერდით მყოფი ადამიანები. „კაცად მაშინ ხარ საქები, თუ ეს წესი წესად დარგე, ყოველ დღესა შენს თავს ჰკითხო, აბა დღეს მე ვის რა ვარგე?“ (ილია ჭავჭავაძე). კარგი იქნებოდა ამის მეტი ენერგია რომ მქონდეს“

.

რესურსები ინტერნეტში

• ნინო დარბაისელი — საქართველოს ბიოგრაფიული ლექსიკონი
• ნინო დარბაისელი დაარქივებული 2021-05-07 საიტზე Wayback Machine.
• ნინო დარბაისელი, შემოქმედება
• ბლოგი
• რაზე აღარ ხარჯავს დროს ნინო დარბაისელი
• ნინო დარბაისელი - ლექსები, პოემები
• ინტერვიუ ნინო დარბაისელთან
• ნინო დარბაისელის ნაწარმოებები საიტზე „ურაკპარაკი“
• დარბაისელი ნინო დაარქივებული 2021-05-11 საიტზე Wayback Machine.