მთაწმინდა (გამომცემლობა)

მასალა ვიკიპედიიდან — თავისუფალი ენციკლოპედია
Jump to navigation Jump to search


„მთაწმინდა“ პირველი დამოუკიდებელი გამომცემლობა იყო კომუნისტური რეჟიმის პირობებში. იგი დააფუძნა ზურაბ კალანდაძემ 1989 წელს. მის დაარსებას წინ უსწრებდა დამფუძნებლის ხანგრძლივი კონსულტაციები ცნობილ ქართველ პოეტთან, მთარგმნელთან და ლიტერატურის მკვლევართან გიორგი კალანდაძესთან (რეპრესირებული იყო 1942-1949 წლებში), ხოლო შემდგომ - ინტენსიური მუშაობა „საღვთისმეტყველო კრებულში“ (მთავარი რედაქტორი - ედიშერ გიორგაძე), რომელიც უწმინდესის და უნეტარესის ილია II-ის ლოცვა კურთხევით და ფინანსური თანადგომით შეიქმნა (იარსება რამდენიმე წელს). ამ ჟურნალში თანამშრომლობდნენ ჩვენი ქვეყნის სასიქადულო მოღვაწენი: ზვიად გამსახურდია, აკაკი ბაქრაძე, ზურაბ კიკნაძე, ბესიკ ადეიშვილი, ელგუჯა გიუნაშვილი და სხვანი, რომელთა ოცნება ეროვნული თვითმყოფადობის აღდგენა და ქართული ლიტერატურულ-კულტურული საგანძურის დაცვა და წარმოჩენა იყო.

ჟურნალის თანამშრომელთაგან რამდენიმემ დაარსებისთანავე დაიწყო მუშაობა გამომცემლობა „მთაწმინდას“ სამეცნიერო ჯგუფში, რომელშიც ასევე მოღვაწეობდნენ: ზურაბ სარჯველაძე, ელგუჯა გიუნაშვილი, მანანა მაჩხანელი, დარეჯან თვალთვაძე, უჩა ცინდელიანი და სხვანი. „მთაწმინდამ“ დროებით შეწყვითა მუშაობა 1994 წელს მძიმე ეკონომიური და პოლიტიკური პირობების გამო და განახლდა 2008 წელს - ამჯერად ზურაბ და გიორგი კალანდაძეების მიერ - იგივე მიზნებითა და ლიტერატურული გეზით, რითაც იყო დაფუძნებული. ესენია:

− ძირითადად იმ პიროვნებათა ნაწარმოებების გამოცემა, რომლებიც დაკრძალულნი არიან მთაწმინდაზე. ასევე იმ პირთა ნამუშევრების წარმოჩენა, რომელთაც მნიშვნელოვანი როლი შეასრულეს ქართული კულტურის განვითარებაში და რომელნიც მათი მოღვაწეობის მნიშვნელობით მთაწმინდის სულიერ მკვიდრთ წარმოადგენენ. − ისეთი ნაწარმოებების წარმოჩენა, რომელიც ხელს შეუწყობს ჩვენი რწმენისა და ეროვნული სახის შეუბღალავად შენარჩუნებას. − ისეთი პროდუქციის წარმოება, რომელიც ქართული კულტურის მსოფლიო ასპარეზზე წარმოჩენას დაეხმარება. − ჭარმაგ ხელოვანთა და ზოგადად დაუბეჭდავი ნამუშევრების გამომზეურება. − ახალგაზრდა ხელოვანთა ხელშეწყობა შემოქმედების ძნელსავალ გზაზე.