მერაბ სეფაშვილი

მასალა ვიკიპედიიდან — თავისუფალი ენციკლოპედია
Jump to navigation Jump to search
მერაბ სეფაშვილი
Merab Sepashvili.jpg
ბიოგრაფია
დაბ. თარიღი 15 ოქტომბერი, 1961 (1961-10-15) (58 წლის)
დაბ. ადგილი თბილისი, საქართველოს სსრ, სსრკ
ჟანრ(ებ)ი პოპი
საქმიანობა მომღერალი
ასოციაციები ვია 75
რერო
თეატრონი

მერაბ სეფაშვილი (დ. 15 ოქტომბერი, 1961) — ქართველი მომღერალი.

ბიოგრაფია[რედაქტირება | წყაროს რედაქტირება]

დაიბადა მომღერლების, ტრიო ლალეს წევრების ედუარდ სეფაშვილის და ჯულიეტა მურადელის ოჯახში. ედუარდს პირველი ქორწინებიდან ასევე ჰყავდა ვაჟი თენგო, რომელიც მერაბზე 10 წლით უფროსი იყო. მერაბი ძირითადად ბებია-ბაბუების გარემოცვაში აღიზარდა, რადგან მშობლებს ხშირი გასტროლები ჰქონდათ, ბავშვობაში სიმღერის მიმართ განსაკუთრებულ სიყვარულს და ინტერესს არ ამჟღავნებდა, თუმცა სხვადასხვა მომღერლების მანერებზე მიბაძვა უყვარდა. მეტად დინჯი და მორცხვი ბავშვი იყო, განსაკუთრებული აკადემიური მოსწრებით არ გამოირჩეოდა, დაკავებული იყო სპორტული აქტივობებით, კერძოდ კალათბურთით, რომელზეც სპორტსმენ ბაბუას, ნიკოლოზ სეფაშვილს დაყავდა.

სიმღერა, 15 წლის ასაკში დაიწყო. 16 წლისა უკვე მღეროდა ანსამბლ რეროში, შემდეგ რობერტ ბარძიმაშვილის ხელმძღვანელობით ანსამბლ 75-ში მღეროდა, ალექსანდრე ბასილაიასთან — ნატვრის ხეში, განსაკუთრებული პოპულარობა კი თეატრონში გატარებულმა პერიოდმა მოუტანა, სადაც მერაბი მთავარი ვოკალისტი იყო, ანსამბლში გია მაჭარაშვილიც ირიცხებოდა, რომელიც ქმნიდა ძირითადად ანსამბლისთვის სიმღერებს, ასევე ასრულებდნენ ნუგზარ ერგემლიძის სიმღერებს.

1990-იანი წლების შემდეგ მერაბმა სოლო მოღვაწეობა დაიწყო. სხვადასხვა დროს მისი შესრულებით პოპულარული იყო სიმღერები: „მოდიოდა თეთრი გოგო“, „ერთმანეთს ვნატრობთ“, „სნეული ვარ“, „თეთრი რაში“, “გაიღიმე“, „ცხოვრება ერთი წამია” და სხვა. 2002 წელს თბილისში მეცენატმა და ბიზნესმენმა, ბადრი პატარკაციშვილმა ჩამოაყალიბა საპროდიუსერო კომპანია ART-იმედი. მასში გაწევრიანებული იყვნენ ისეთი მომღერლები, როგორიცაა: ლელა წურწუმია, ნატო მეტონიძე, ეკა კვალიაშვილი, ეკა მამალაძე, თემურ თათარაშვილი, ეკა კახიანი და სხვა. მათ შორის მერაბ სეფაშვილიც, რომელიც არტ-იმედის ერთ-ერთი უმთავრესი სახე და გენერალური მენეჯერი იყო.

1983 წელს, 22 წლის ასაკში დაქორწინდა მუსიკამცოდნე ნინო ჯურხაძეზე, წყვილს ორი ვაჟი ჰყავს — ნიკა და სანდრო.

2012 წლის 20 მაისს ფილარმონიის დიდი საკონცერტო დარბაზის წინ მერაბ სეფაშვილის სახელობის ვარსკვლავი გაიხსნა. ის საქართველოში ყველაზე ახალგაზრდაა იმ ადამიანებს შორის, ვისაც ვარსკვლავი გაუხსნეს.

რესურსები ინტერნეტში[რედაქტირება | წყაროს რედაქტირება]