ლუნა ლავგუდი (ჰარი პოტერი)

ლუნა ლავგუდი — პერსონაჟი როულინგის ჰარი პოტერის სერიის რომანებში. ლუნა პირველად გამოჩნდა ჰარი პოტერი და ფენიქსის ორდენში (2003). ლუნას ჰარი პოტერის ფილმებში განასახიერებს ევანა ლინჩი.

დახასიათება

ლუნას თავდაპირველად ერქვა ლილი მუნი. როულინგმა წარმოიდგინა გოგონა როგორც „ზღაპრული, მეოცნებე გოგონა" და მისი გვარი ხსენებულია ჰარის განაწილების ცერემონიალზე. როულინგმა აღწერა ლუნა როგორც „ანტი-ჰერმიონა", რადგან ლუნა რწმენის საშუალებით მიდის შეხედულებებთან, როცა ჰერმიონა ეყრდნობა ფაქტებსა და ლოგიკას. ჰერმიონა არაერთხელ ცდილობს დაარწმუნოს ლუნა, რომ ეს რწმენა უაზრობაა, მაგრამ ეს მხოლოდ აღიზიანებს ლუნას, რაც იშვიათია. ლუნა გამჭრიახია ადამიანის ბუნების მიმართ და ჰარი აღნიშნავს გოგონას უნარს პირდაპირი გულწრფელობისთვის, რაც შეიძლება იყოს უხერხული, მაგრამ ყოველთვის ნათელი და ჭეშმარიტი. იგი თავის მეგობრებს აფასებს; მან დახატა ჰარის, რონის, ჰერმიონას, ჯინის და ნევილის პორტრეტები თავისი ოთახის ჭერზე, მათ გარშემო კავშირებით, რომლებზეც წერია მეგობრები. (როგორც ნაჩვენებია მე-7 წიგნში/ფილმში.) ლუნას მამა არის ქსენოფილიუს ლავგუდი, ჟურნალის The Quibbler-ის რედაქტორი. ლუნამ იხილა თავისი დედის სიკვდილი, როდესაც იგი ცხრა წლის იყო, რაც საშუალებას აძლევს მას დაინახოს თესტრალები.

ინტერვიუებში „სიკვდილის საჩუქრების" გამოსვლის შემდეგ, როულინგმა გამოავლინა ფაქტები ლუნას ცხოვრების შესახებ ჰოგვორტსის შემდეგ. ლუნა აგრძელებს კარიერას როგორც „მაგიზოოლოგი", რაც არის ზოოლოგი ჯადოსნური არსებებისთვის. იგი აღმოაჩენს ცხოველების ბევრ ახალ სახეობას და ამის გამო საკმაოდ ცნობილი ხდება. ლუნა ქორწინდება როლფ სკამანდერზე, რომელიც არის ნატურალისტი და ნიუტ სკამანდერის შვილიშვილი . ლუნას და როლფს ჰყავთ ტყუპი ვაჟები, ლორკანი და ლისანდერი.

გამოჩენები

რომანები

„ჰარი პოტერი და ცეცხლოვანი თასი" (2000) შეიცავს ყველაზე პირველ და ერთადერთ მოკლე მოხსენიებას გვარის ლავგუდის შესახებ დასაწყისში. თავად ლუნა პირველად გამოჩნდება რომანში „ჰარი პოტერი და ფენიქსის ორდენი" (2003) როგორც რეივენკლოს სტუდენტი, განაწილებული მისი გონიერებისა და კრეატიულობის გამო, რომელიც აღმოჩნდა ჰარიზე ერთი კლასით ქვემოთ. სხვა სტუდენტები მას უწოდებენ „გიჟ ლავგუდს" იმის გამო, რომ ბევრი მის რწმენას „უცნაურად" მიიჩნევენ. ლუნას და მის მამას, ქსენოფილიუსს, სჯერათ ჰარის და ალბუს დამბლდორის მიერ გაკეთებულ განცხადებებს, რომ ლორდი ვოლდემორი დაბრუნდა. ლუნა და ჰერმიონა გრეინჯერი არწმუნებენ ჟურნალისტ რიტა სკიტერს ჩაატაროს ინტერვიუ ჰარისთან, რათა მისი განცხადებები გამოქვეყნდეს The Quibbler-ში, ჟურნალში, რომელსაც რედაქტირებას უწევს ქსენოფილიუსი. რომანის განმავლობაში ლუნა ივარჯიშებს თავს თავდაცვით ჯადოქრობაში, როგორც დამბლდორის არმიის წევრი. სიუჟეტის ბოლოს ლუნა მონაწილეობს ბრძოლაში სიკვდილის მხვრელების წინააღმდეგ მაგიის სამინისტროში. „ნახევარსისხლიან უფლისწულში" (2005), ლუნა ესწრება ჰორეს სლაგჰორნის საშობაო წვეულებას ჰარისთან ერთად. როდესაც სიკვდილის მხვრელები თავს ესხმიან ჰოგვორტსს, ლუნა, ჯინი და ნევილი ცდილობენ დაიცვან სკოლა.

ლუნა იწყებს თავის მეექვსე წელს ჰოგვორტსში „სიკვდილის საჩუქრებშ„" (2007). იგი და ჯინი ეხმარებიან ნევილს აღადგინოს დამბლდორის არმია, რაც გააბრაზებს სიკვდილის მხვრელებს, რომლებიც ახლა აკონტროლებენ სკოლას. იმედის მიცემით, რომ დაეხმარონ ჰარის მისიას ჰორკრუქსების განადგურების თაობაზე, ლუნა და მისი მეგობრები ცდილობენ მოიპარონ გრიფინდორის მახვილი სევერუს სნეიპის ოფისიდან. მათ დაიჭერენ და მიეცემათ მსუბუქი სასჯელი: მოგზაურობა აკრძალულ ტყეში რუბეუს ჰაგრიდთან ერთად. საშობაოდ სახლში მოგზაურობისას ჰოგვორტსის ექსპრესით, ლუნას იტაცებენ სიკვდილის მხვრელები. ისინი ლუნას მძევლად იჭერენ, რათა შეაჩერონ მისი მამა, არ გამოაქვეყნოს ჰარის მხარდამჭერი შინაარსის სტატიები The Quibbler-ში. ჰარი, რონი და ჰერმიონა ასევე ტყვედ ვარდებიან ვოლდემორის მიმდევრების მიერ, რომლებიც მათ ამწყვდევენ მალფოის მამულის სარდაფში ლუნასთან და მისტერ ოლივანდერთან ერთად. ყველა პატიმარი საბოლოოდ გადარჩება სახლის ელფ დობის წყალობით.

ჰოგვორტსის ბრძოლის დროს ლუნა იბარებს თავის პატრონუსს, კურდღელს, რათა მოიგერიოს ასობით დემენტორი, რომლებიც აპირებენ თავს დაესხან მის მეგობრებს. ლუნა, ჰერმიონა და ჯინი იბრძვიან ბელატრიქს ლესტრეინჯთან, სანამ მოლი უიზლი არ ჩაერევა და მოკლავს ბელატრიქსს. ბრძოლის შემდეგ ლუნა ეხმარება ჰარის გაძვრეს სადღესასწაულო ბრბოდან, რათა იპოვოს სიმშვიდე და სიწყნარე. რომანის ეპილოგში ცხადდება, რომ ჰარის და ჯინის საბოლოოდ ჰყავთ ქალიშვილი სახელად ლილი. ITV-ის დოკუმენტურ ფილმში როულინგმა თქვა, რომ ლილის შუა სახელი არის ლუნა.

ფილმის ადაპტაციები

ლუნა გამოჩნდება ფილმის ადაპტაციებში „ფენიქსის ორდენის" (2007), „ნახევარსისხლიანი უფლისწულის" (2009) და „სიკვდილის საჩუქრების" – ნაწილი 1 (2010) და ნაწილი 2-ში (2011). ევანა ლინჩი დაინიშნა როლში სირშა რონანზე.}} როულინგმა ლინჩს უწოდა „სრულყოფილი" როლისთვის. როდესაც ვითარდებოდა ლუნას პერსონაჟის ვიზუალური სტილი, კოსტიუმის დიზაინერმა ჯანი ტემიმმა განაცხადა, რომ ლუნა „აშკარად გოგონაა თავისი საკუთარი გემოვნებითა და საკუთარი ჰობით, რომელიც მოიცავს საკუთარი სამკაულების დამზადებას". ამრიგად, ლუნას დამახასიათებელი რადისის ფორმის საყურეები და ბატერბიის თავსახურისგან დამზადებული ყელსაბამი, რომლებსაც წიგნებში მოიხსენიებენ, გამოსახულია ფილმებში. ლუნას „ხალხური ხელოვნების" აურა შემუშავდა შეუსაბამო ჩაცმულობით, ძირითადად მეწამულ და ლურჯ ფერებში, რომლებშიც წარმოდგენილია ცხოველები ან ბუნებრივი ელემენტები.

მიღება

გასართობმა ვებსაიტმა IGN ლუნა დაასახელა მე-12 საუკეთესო ჰარი პოტერის პერსონაჟად. ვებსაიტმა ლუნას უწოდა გმირული და თქვა, რომ იგი გადამწყვეტ როლს თამაშობს სტუდენტურ ჯგუფში დამბლდორის არმია. ჟურნალმა Empire ლუნა აღიარა როგორც მე-10 საუკეთესო პერსონაჟი ჰარი პოტერის ფრაენჩაიზში.