ლედი დიმიტრესკუ
ლედი ალსინა დიმიტრესკუ (ასევე ცნობილი,როგორც ლედი დიმიტრესკუ) ― პერსონაჟი „Resident Evil“-ის საშინელებათა ვიდეო თამაშების სერიიდან, რომელიც შექმნილია იაპონური კომპანიის „Capcom“-ის მიერ. 2021 წელს გამოსული „Resident Evil 8“-ის ერთ-ერთი მთავარი ბოროტმოქმედი. ის არაბუნებრივად მაღალი, დიდგვარვნული წარმოშობის ქალია ვამპირის მსგავსი თვისებებით. ცხოვრობს სამ ქალიშვილთან სასახლე დიმიტრესკუში და მართავს მამულს დანარჩენ სამ ლორდთან ერთად. ლედი დიმიტრესკუს გარეგნული დიზაინი დაფუძნებულია პოლონელ მოდელზე, ჰელენა მანკოვსკაზე, ხოლო ის გაახმოვანა და ითამაშა ამერიკელმა თეატრის მსახიობმა მეგი რობერტსონმა. ლედი დიმიტრესკუმ პოპულარობა მოიპოვა თამაშის გამოსვლიდან საათებში და უამრავი ფანის საყვარელი პერსონაჟი გახდა,ხოლო მეგი რობერტსონმა მრავალი ჯილდო მიიღო
პერსონაჟზე მუშაობა და ვიზუალი
[რედაქტირება | წყაროს რედაქტირება]დიმიტრესკუ 2,9 მეტრის სიმაღლისაა, მისი ქუდისა და მაღალქუსლიანების ჩათვლით. ტაკანოს, თამაშის დიზაინერს, სურდა ლედი არ ყოფილიყო ტიპური გოთი, ამიტომ მისი სამოსი 1930-იანი წლების მოდის ტენდენციებსაა შეხამებული. ალსინას ქალიშვილების, „დიმიტრესკუს დების“ კაბებზე კი საოჯახო გერბია ამოქარგული. გოგონები ძალიან ჰგვანან დრაკულას პატარძლებს, როგორც თვისებებით, ისე ჩაცმულობითაც. ალსინას ელეგანტური ქუდი, სამკაული, მაკიაჟი და კაბა პერსონაჟს წარსულის აჩრდილის მსგავს გარეგნობას აძლევს, რაც კიდევ უფრო ამძაფრებს შიშის გრძნობას. დიმიტრესკუს ყველაზე ცნობილი ატრიბუტები მისი სიგარეტის დამჭერი და გრძელი, ხმლების მსგავსი კლანჭებია, რომლებიც მსხვერპლის დანახვისას ორივე ხელთათმანიდან გამოდის.
ისტორია
[რედაქტირება | წყაროს რედაქტირება]ალსინა დაიბადა დიდგვაროვანთა გვარის, დიმიტრესკუს ოჯახში პირველ მსოფლიო ომამდე და მამულისგან მოშორებით ცხოვრობდა. მეორე მსოფლიო ომის დამთავრებისა და თავადაზნაურობის გაუქმების შემდეგ, დიმიტრესკუ დაბრუნდა თავისი ოჯახის ყოფილ მიწებზე, რომლებიც უკვე „დედა მირანდას“ კონტროლის ქვეშ იყო. დიმიტრესკუმ მირანდასთან შეხვედრამდე შეიტყო, რომ ჰქონდა სისხლის მემკვიდრეობითი დაავადება. ამის გამო, ის დათანხმდა მირანდას ექსპერიმენტებს (მირანდა მაგიური ძალების მქონე ყოფილი ექიმი იყო, რომელსაც უნდოდა, ეპიდემიაში გარდაცვლილი ქალიშვილი გაეცოცხლებინა და ამისთვის კადუს ვირუსით ექსპერიმენტებს ატარებდა სხვადასხვა ადამიანზე). მიუხედავად იმისა, რომ ექსპერიმენტმა ალსინას ზებუნებრივი რეგენერაციული შესაძლებლობები გაუღვიძა და სიმაღლეში წარმოუდგენლად გაზარდა, უკვე არსებული სისხლის დაავადება მხოლოდ გაუარესდა და ლედი ვამპირად აქცია. მამულში დასახლებისთანავე მან დაიბრუნა ოჯახის ვენახები და ღვინის ბიზნესი, რათა თავი ერჩინა. რადგან დიმიტრესკუს ოჯახი მჭიდროდ იყო დაკავშირებული ბენევიენტოს, მოროსა და ჰაიზენბერგის აგრეთვე დიდგვაროვან ოჯახებთან, ალსინამ შეინარჩუნა მათთან ალიანსი და ოთხივე ლორდი მირანდას დაუქვემდებარდა. მას თამაშის განმავლობაში თავი მირანდას ფავორიტად მიიჩნია, რადგან ექსპერიმენტების ყველაზე კარგი შედეგი სწორედ ალსინა იყო. ლედის აგრეთვე ჰქონდა ქიშპობა ლორდ კარლ ჰაიზენბერგთან და ჰყავდა სამი ქალიშვილი, რომლებიც კადუს ვირუსისა და ფარვანების შეერთებით წარმოიშვნენ.
საკუთარ მამულს,სასახლე დიმიტრესკუსა და მიმდებარე მიწებს ალსინა და მისი სამი ვამპირი ქალიშვილი, ბელა, დანიელა და კასანდრა სასტიკად მართავდნენ, ხოლო მათი მსხვერპლნი სასახლეში სამუშაოდ მისული მოახლეები და მსახურები იყვნენ.
თამაშში ეთან ვინთერსი, რომლის ქალიშვილიც მირანდამ გაიტაცა მორიგი ექსპერიმენტისთვის, პირველად ხვდება დიმიტრესკუს ოთხი ლორდის შეხვედრაზე, სადაც მირანდა ეთანს კარლ ჰაიზენბერგს უბოძებს. ეს დიმიტრესკუს მხრიდან შურსა და აღშფოთებას იწვევს. ჰაიზენბერგისგან გაქცევის შემდეგ, ეთანი მიდის მათ სასახლეში და დიმიტრესკუსა და მის ქალიშვილებს ებრძვის. შესვლიდან ცოტა ხანში ის დებმა შეიპყრეს და კედელზე მიაბეს, მაგრამ ეთანმა მოახერხა თავის განთავისუფლება. მალევე მან სამივე ვამპირი სათითაოდ დაამარცხა, რადგან მათი სისუსტე სიცივე იყო და ბრძოლის დროს ფანჯრები ჩაამსხვრია, რითიც სიცივე შემოუშვა. ამან ლედი დიმიტრესკუ, როგორც დედა, სულიერად გაანადგურა, განარისხა და შურისძიების სურვილი გაუღვიძა. მან უგულებელყო მირანდას ბრძანებები პირადად ეთანის მოკვლის შესახებ და გადაწყვიტა, ის სიცოცხლეს გამოესალმებინა. ალსინა ამბობდა, რომ თუ ეთანმა ქალიშვილები დაუხოცა, მაშინ საკუთარ, გატაცებულ შვილსაც ვეღარასდროს ნახავდა. ეთანმა ძველი, ვერცხლის ხანჯალი იპოვა და ამით მხოლოდ დიმიტრესკუს ვამპირის ფორმა დაამარცხა. თუმცა, ალსინამ მუტაცია განიცადა და ნამდვილი სახე, ანუ დრაკონის მსგავსი არსება გამოავლინა. საბოლოოდ, ეთანმა ეს დრაკონიც მოკლა და დაფერფლილი დატოვა დიმიტრესკუს საგვარეულო სამარხში.
მარკეტინგი
[რედაქტირება | წყაროს რედაქტირება]„Resident Evil Village“-ის პოპულარიზაციისთვის, სტუდია „Capcom“-მა დაადგმევინა ლედი დიმიტრესკუს რეალური ზომის მუყაოს ფიგურები ვიდეო თამაშების მაღაზიებში. ჰონგ კონგში პერსონაჟის ამსახველი რეკლამები გამოიფინა საზოგადოებრივ ტრანსპორტში 2021 წლის დასაწყისში. ლედი დიმიტრესკუს სამი ფუტის სიმაღლის ქანდაკება, რომელიც დამზადებულია „PureArts“-ის მიერ „Capcom“-თან თანამშრომლობით, გამოვიდა 2023 წლის მეორე ნახევარში. ალსინა აგრეთვე გამოჩნდა „Domino's Pizza Malaysia“-ს ყუთებზე. „Capcom“-მა გამოუშვა მანქანის სტიკერებიც ლედი დიმიტრესკუს გამოსახულებით და დაამზადა 1649 აშშ დოლარის ღირებულების გიგანტური ქანდაკება.
მოგებული ჯილდოები
[რედაქტირება | წყაროს რედაქტირება]მეგი რობერტსონმა მრავალი ჯილდო დაიმსახურა ლედი დიმიტრესკუს როლისთვის. მან მოიგო:
- „საუკეთესო ვიდეო თამაშის მსახიობი“ „Golden Joystick Awards 2021“-ზე.
- „საუკეთესო შესრულება ვიდეო თამაშში“ „The Game Awards“-ზე.
- „Great White Way“-ის ჯილდო „თამაშში საუკეთესო როლისთვის“ მე-11 ყოველწლიურ ნიუ-იორკის დაჯილდოებაზე.
- „D.I.C.E“