კურტ ზაქსი

კურტ ზაქსი (გერმ. Curt Sachs; დ. 29 ივნისი, 1881, ბერლინი, — გ. 5 ნოემბერი, 1959, ნიუ-იორკი) — გერმანელი მუსიკისმცოდნე, თანამედროვე ორგანოლოგიის (მუსიკალური ინსტრუმენტების სისტემური კვლევისა და კლასიფიკაციის) ერთ-ერთი ფუძემდებელი.

დაამთავრა ბერლინის უნივერსიტეტი (1904). 1920 წლიდან იყო ბერლინის მუსიკის უმაღლესი აკადემიისა და უნივერსიტეტის პროფესორი. ებრაული წარმომავლობის გამო 1933 წლიდან ემიგრაციაში ცხოვრობდა და მუშაობდა: 1933–1937 წლებში — პარიზში, 1937 წლიდან — ამერიკის შეერთებული შტატებში, სადაც იყო ნიუ-იორკის, შემდეგ კოლუმბიის უნივერსიტეტის პროფესორი. მისი ძირითადი შრომებია: „საკრავთა ლექსიკონი” (1913), „საკრავთმცოდნეობის სახელმძღვანელო” (1920). მათში აღწერილი და დახასიათებულია მსოფლიოს ხალხთა საკრავები, მ. შ. ქართულიც, კერძოდ, ჩანგი, ჩონგური, სალამური, სტვირი, გუდასტვირი. აქვს გამოკვლევები ანტიკური მუსიკალური კულტურის შესახებაც.

ლიტერატურა

ენციკლოპედია „საქართველო“, ტ. 3, თბ., 2014. — გვ. 325.
კურტ ზაქსი — სტატია ენციკლოპედია ბრიტანიკიდან (ინგლისური)