იზოლა ბელა (სიცილია)

იზოლა ბელა (სიცილიურად: იზულა ბედა) — პატარა კუნძული ტაორმინასთან ახლოს, სიცილიაში, სამხრეთ იტალიაში. ასევე ცნობილია, როგორც იონიის ზღვის მარგალიტი. მდებარეობს იონიის ზღვის პატარა ყურეში; გარკვეული პერიოდის განმავლობაში ფლორენს ტრეველიანის კერძო საკუთრება იყო, 1990 წლამდე, სანამ სიცილიის რეგიონმა არ შეიძინა და ნაკრძალად გადაკეთდა, რომელსაც ბუნების მსოფლიო ფონდის იტალიის ფილიალი ადმინისტრირებას უწევდა. კუნძულს ხშირად აკავშირებს ვიწრო ბილიკი მატერიკის სანაპიროსთან. გარშემორტყმულია ზღვის გამოქვაბულებით და აქვს პატარა და საკმაოდ კლდოვანი პლიაჟი.

ისტორია

ორი სიცილიის მეფე ფერდინანდ I-მა კუნძული 1806 წელს მეზობელ ქალაქ ტაორმინას აჩუქა. 1890 წელს კუნძული ქალაქიდან ტრეველიანმა იყიდა, რომელმაც ზღვის პირას პატარა სახლი ააშენა და ეგზოტიკური მცენარეები შემოიტანა, რომლებიც ხმელთაშუა ზღვის კლიმატში ხარობდა. შემდგომმა მფლობელებმა კუნძული შეინარჩუნეს მანამ, სანამ მფლობელი არ გაკოტრდა და 1990 წელს კუნძული აუქციონზე არ გაიტანეს. კუნძული ბუნების დამცველებმა ჯერ კიდევ 1983 წელს შენიშნეს. რეგიონმა ის სწრაფად შეიძინა და დაცულ ბუნებრივ ძეგლად გამოაცხადა. კუნძულზე ფრინველებისა და ხვლიკების რამდენიმე სახეობა ბინადრობს.