ზურაბ საკანდელიძე

მასალა ვიკიპედიიდან — თავისუფალი ენციკლოპედია
Jump to navigation Jump to search

ზურაბ საკანდელიძე (დ. 9 აგვისტო, 1945, ქუთაისი, საქართველოს სსრ — გ. 25 იანვარი, 2004, თბილისი, საქართველო) — ქართველი კალათბურთელი. სიმაღლე — 186 სმ. თამაშობდა თბილისის „დინამოსა“ (1963–1975 წლებში) და სსრკ ნაკრებში (1965–1973 წლებში).

ქართველი კალათბურთელებიდან ოლიმპიური ჩემპიონის ტიტულს მხოლოდ ზურაბ საკანდელიძე და მიხეილ ქორქია ფლობენ. 1967 წელს, ჰელსინკში (ფინეთი) გამართულ ევროპის ჩემპიონატზე ზურაბ საკანდელიძე საუკეთესო მცველად აღიარეს და ტურნირის სიმბოლურ ნაკრებში დაასახელეს. 1979–1983 წლებში საკალათბურთო კლუბ თბილისის „დინამოს“ მთავარი მწვრთნელი იყო. 2006 წლიდან საქართველოს კალათბურთის ფედერაცია ყოველწლიურად ატარებს ოლიმპიური ჩემპიონების — ზურაბ საკანდელიძის და მიხეილ ქორქიას სახელობის ტურნირს.

2011 წელს, სერიაში „ქართველი ოლიმპიური ჩემპიონები“ (პროექტის ავტორი და მთავარი რედაქტორი ელგუჯა ბერიშვილი) გამოიცა დავით ჭელიძის წიგნი „ზურაბ საკანდელიძე“. 2015 წლის 14 ოქტომბერს, ზურაბ საკანდელიძის 70 წლის იუბილესთან დაკავშირებით, ქუთაისში მისი ბიუსტი დაიდგა, გამოიცა ზურაბ ჯავახაძის წიგნი „ოქროზე ძვირფასი ზურაბ საკანდელიძე — ოლიმპიური სინჯის ოქროს მედალოსანი“ და მოეწყო ფოტოგამოფენა. 2017 წელს გადაღებულ რუსულ მხატვრულ ფილმში „3 წამი“ (რეჟისორი ანტონ მეგერდიჩევი), რომელიც საბჭოთა კავშირის კალათბურთელთა ნაკრების მიერ მიუნხენის ოლიმპიადაზე გამარჯვებას ეძღვნება, ზურაბ საკანდელიძის როლი ირაკლი მიქავამ შეასრულა. თბილისში, ბაგებში, ერთ-ერთი ქუჩა ზურაბ საკანდელიძის სახელობისაა.

პირადი და გუნდური მიღწევები[რედაქტირება | წყაროს რედაქტირება]

  • 1972 წლის მიუნხენის ოლიმპიური თამაშების ჩემპიონი
  • 1968 წლის მეხიკოს ოლიმპიური თამაშების ბრინჯაოს პრიზიორი
  • მსოფლიოს ჩემპიონი (1967 წელს) და ბრინჯაოს პრიზიორი (1970 წელს)
  • ევროპის ოთხგზის ჩემპიონი (1965, 1967, 1969, 1971 წლებში) და მესამე ბრინჯაოს პრიზიორი (1973 წელს)
  • სსრკ თასის მფლობელი (1969 წელს)
  • ევროპის ჩემპიონატის საუკეთესო მცველი (1967 წელს)
  • მსოფლიოს სიმბოლური ნაკრების წევრი (1967 წელს)
  • საქართველოს წლის საუკეთესო სპორტსმენი (1967 წელს)
  • სსრკ სპორტის დამსახურებული ოსტატი.
  • ღირსების ორდენისა და ვახტანგ გორგასლის I ხარისხის ორდენის კავალერი.

ძირითადი შედეგები[რედაქტირება | წყაროს რედაქტირება]

წელი ტურნირი მასპინძელი ადგილი
1965 ევროპის ჩემპიონატი სსრკ 1st
1967 ევროპის ჩემპიონატი ფინეთი 1st
1967 მსოფლიო ჩემპიონატი მონტევიდეო, ურუგვაი 1st
1968 ზაფხულის XIX ოლიმპიური თამაშები მეხიკო, მექსიკა 3rd
1969 ევროპის ჩემპიონატი იტალია 1st
1970 მსოფლიო ჩემპიონატი იუგოსლავია 3rd
1971 ევროპის ჩემპიონატი გერმანია 1st
1972 ზაფხულის XX ოლიმპიური თამაშები მიუნხენი, გფრ 1st
1973 ევროპის ჩემპიონატი ესპანეთი 3rd

რესურსები ინტერნეტში[რედაქტირება | წყაროს რედაქტირება]