ვიდონი-კაფარელის სასახლე
| ვიდონი-კაფარელის სასახლე Palazzo Vidoni Caffarell | |
|---|---|
 სასახლის ფასადი | |
| მდებარეობა | რომი, იტალია |
| მოქანდაკე | ლორენცო ლოტი |
| ტიპი | სასახლე |
| დაწყების თარიღი | 1515 |
| დასრულების თარიღი | 1536 |
ვიდონი-კაფარელის სასახლე (იტალ. Palazzo Vidoni Caffarelli) — სასახლე რომში, რომელიც მდებარეობს სანტ’ეუსტაკიოს რაიონში, ვია დელ სუდარიოს, პიაცა ვიდონისა და კორსო ვიტორიო ემანუელეს გადაკვეთაზე.
ისტორია
[რედაქტირება | წყაროს რედაქტირება]რენესანსული სტილის ეს სასახლე, რომლის დიზაინი დიდი ხნის განმავლობაში რაფაელს მიაწერებოდა, რა თქმა უნდა მისი ხელით არ არის შექმნილი, არამედ მისი ერთ-ერთი მოსწავლის — ლორენცო ლოტის, მეტსახელად „ილ ლორენცეტოს“ პროექტია. იგი აიგო 1515-1536 წლებში ბერნარდინო კაფარელისთვის, შემდეგ კი კარდინალ სტოპონის საკუთრებაში გადავიდა. მე-18 საუკუნეში შენობა კარდინალი ვიდონის საკუთრებაში გადავიდა, რომელმაც იგი გააფართოვა. მე-20 საუკუნის დასაწყისში აქ გერმანიის საელჩო მდებარეობდა, დღეს კი სახელმწიფო მოხელეთა სამინისტრო (Ministry of Public Functions) ფუნქციონირებს.
დიზაინი
[რედაქტირება | წყაროს რედაქტირება]შენობის დიზაინი კლასიკურ რენესანსულ სტილს ეფუძნება, რომელიც, სავარაუდოდ, ბრამანტეს მიერ შემუშავებული კაპრინის სასახლის პროექტიდან არის შთაგონებული. შენობის ფასადის დეკორი თანმიმდევრულად იცვლება შიდა ფუნქციონალის შესაბამისად: პირველი სართული უხეში ქვისაა და ციხესიმაგრისებური გარეგნობა აქვს, ხოლო მეორე სართულზე, პიანო ნობილეზე, დორიული ორდერის სვეტებითაა მორთული.
ვიდონი-კაფარელის სასახლეში დაცულია XVI საუკუნის ფრესკები კარლ V-ის დარბაზში, რომლებიც იმპერატორის ცხოვრების მოვლენებს ასახავს. მათი ავტორი უცნობია, თუმცა მათ მანერისტი მხატვრის, პერინ დელ ვაგას სკოლას მიაკუთვნებენ. ასევე, სასახლეში XVIII საუკუნის ფრესკებია, რომლებიც ნიკოლა ლაპიკოლას, ბერნარდინო ნოკის, ტომასო კონკას და ლუდოვიკო მაცანტის შემოქმედებას მიეწერება. შენობის ინტერიერში რომაული ქანდაკებებია განლაგებული, მათ შორის – იმპერატორ ლუციო ავრელიო ვეროს ქანდაკება, ასევე რომაული სარკოფაგიდან აღდგენილი შადრევანი. აქვეა წმინდა მარკოს ვენეციური ლომის მარმარილოს პორტალის დეკორი, რომელიც ხორვატიის ერთ-ერთი ქალაქიდანაა ჩამოტანილი[1].
რესურსები ინტერნეტში
[რედაქტირება | წყაროს რედაქტირება]- Lucentini, M. (31 December 2012). The Rome Guide: Step by Step through History's Greatest City. ISBN 9781623710088.
სქოლიო
[რედაქტირება | წყაროს რედაქტირება]- ↑ Official website დაარქივებული 2014-02-03 საიტზე Wayback Machine.