დავით ნიკურაძე

დავით ნიკურაძე (დ. 2 ნოემბერი, 1975) — ქართველი ჟურნალისტი, სამაუწყებლო კომპანია რუსთავი 2-ის ამერიკის კორესპონდენტი.

ბიოგრაფია

დაამთავრა თბილისის სახელმწიფო უნივერსიტეტის ჟურნალისტიკის ფაკულტეტი. სტაჟირება აქვს გავლილი თურქეთის ტელევიზიაში, მოგვიანებით კი დაასრულა სპეციალური პროგრამა ბელგიაში, ევროკავშირის გაფართოების თემაზე.

კარიერა

დავით ნიკურაძემ ჟურნალისტური მოღვაწეობა 18 წლის ასაკში დაიწყო. თავდაპირველად მუშაობდა გაზეთ ”დვრიტაში”. 1995 წლიდან ტელეკომპანია ”იბერვიზიიდან” გადმოსულ ახალგაზრდა ჟურნალისტების გუნდთან ერთად საქართველოს სახელმწიფო ტელევიზიაში ამზადებდა ღამის საინფორმაციო პროგრამა ”ქვიშის საათს”. 1998 წლიდან დავით ნიკურაძე მუშაობს სამაუწყებლო კომპანია ”რუსთავი 2”-ის საინფორმაციო სამსახურში.

საინფორმაციო და ანალიტიკური რეპორტაჟების გარდა ნიკურაძეს მომზადებული აქვს დოკუმენტური ფილმები, მათ შორის ”ალასკა”, ”ამერიკის საავიაციო უსაფრთხოება 11 სექტემბრის შემდეგ”, ”ცხინვალის რეგიონის ეკონომიკური რეაბილიტაცია” (ქართული მედიის მიერ მომზადებული ერთადერთი დოკუმენტური ფილმი სამხრეთ ოსეთში პირველი შეიარაღებული კონფლიქტის შემდეგ).

დავით ნიკურაძეს გაშუქებული აქვს ამერიკის 2004 ,2008 , 2012 და 2017 წლების საპრეზიდენტო არჩევნები, ქარიშხალ ”კატრინას” ტრაგედია ნიუ ორლეანში, ამზადებდა სიუჟეტებს ვატიკანიდან რომის პაპის იოანე-პავლე II-ს გარდაცვალების დროს, მიჰყავდა რეპორტაჟები თურქეთის ჰოსპიტალებიდან ფრინველის გრიპის ეპიდემიის შესახებ. აღებული აქვს ინტერვიუები არაერთი ცნობილ პოლიტიკოსისგან და საზოგადო მოღვაწისგან.

2005 წელს მან თეთრ სახლში ექსკლუზიური ინტერვიუ ჩაწერა შეერთებული შტატების პრეზიდენტთან ჯორჯ ბუშთან.
ნიკურაძე იყო პირველი ქართველი ჟურნალისტი, რომელმაც ავღანეთში ამერიკის სამხედრო ოპერაცია გააშუქა. ერაყის სამხედრო კამპანიის დროს კი ნიკურაძე 2 თვის მანძილზე იმყოფებოდა კატარის ქალაქ ას-სალიაში განლაგებულ ამერიკულ სამხედრო ბაზაზე და ამზადებდა რეპორტაჟებს ერაყის ომის შესახებ.

2009 წლის ივნისში დავით ნიკურაძემ მოამზადა გადაცემები ბევერლი ჰილსიდან მსოფლიო ესტრადის ვარსკვლავის მაიკლ ჯექსონის გარდაცვალების შესახებ. 2011 წელს კი ის ნორვეგიიდან აშუქებდა მოვლენებს ქალაქ ოსლოსა და კუნძულ უტეიაზე მომხდარი ტერორისტული აქტების შესახებ. ასევე ის აშუქებდა უიტნი ჰიუსტონის მოულოდნელ სიკვდილს ბევერლი ჰილზის სასტუმრო ჰილტონიდან და მომღერლის დაკრძალვას ნიუ ჯერსის ქალაქ ნიუარკიდან.

დავით ნიკურაძეს მომზადებული აქვს მოკლემეტრაჟიანი დოკუმენტური ფილმი მოდის ბიზნესზე იტალიაში და ჩაწერილი აქვს ინტერვიუ ცნობილი დიზაინერის ბულგარის ოჯახთან. 2011 წელს მან ტელეკომპანია სიენენისთვის მოამზადა რეპორტაჟი საქართველოში ახალი წლის დღესასწაულის აღნიშვნის შესახებ. ნიკურაძე თანამშრომლობდა რადიოსაგურ ”ამერიკის ხმასთან” და ”რადიო თავისუფლებასთან”.

2004 წლიდან დავით ნიკურაძე მუშაობს ამერიკის შეერთებულ შტატებში, სამაუწყებლო კომპანია რუსთავი 2-ის ბიუროში და ძირითადად ამზადებს რეპორტაჟებს ამერიკის სახელმწიფო დეპარტამენტიდან, თეთრი სახლიდან, კონგრესიდან და ვაშინგტონში განლაგებული საერთაშორისო ორგანიზაციებიდან. რუსთავი 2-ის ამერიკის ბიურო ბაზირებულია ვაშინგტონში, თუმცა ის პასუხისმგებელია მნიშვნელოვანი მოვლენების გაშუქებაზე მთელს შეერთებული შტატებსა და კანადაში.

რესურსები ინტერნეტში

• დავით ნიკურაძის ინტერვიუ ჯორჯ ბუშთან
• ინტერვიუ დავით ნიკურაძესთან
• ქარიშხალ ”კატრინას” ტრაგედია
• ნიკურაძის რეპორტაჟი სიენენისთვის