გლდანის არქეოლოგიური ძეგლები

მასალა ვიკიპედიიდან — თავისუფალი ენციკლოპედია
Jump to navigation Jump to search

გლდანის არქეოლოგიური ძეგლები — შუა ბრინჯაოს, გვიანდელი ბრინჯაოს, რკინის ხანის არქეოლოგიური ძეგლები გლდანის მასივში და სოფელ გლდანის ტერიტორიაზე. უძველესი ხევძმარის სამაროვანზე გათხრილი შუა ბრინჯაოს ხანის დასასრულის (ძვ.წ.II ათასწლეული II მეოთხედში) რამდენიმე სამარხი. აქვე გაითხარა გვიანდელი ბრინჯაოს - ადრინდელი რკინის ხანის (ძვ. წ. II ათასწლეული II ნახევარი - ძვ.წ I ათასწლეული I ნახევარი) სამარხები. ამ სამაროვნის მახლობლად გლდანის მასივის V მიკრორაიონის ტერიტორიაზე მდებარეობს გვიანდელი ბრინჯაოს - ადრინდელი რკინის ხანის ე. წ. საბატონოს სამაროვანი. აღნიშნული სამაროვნების თანადროული 2 ნასახლარი მდებარეობს ხევძმარის მარჯვვენა ნაპირზე. ერთი უშუალოდ მდინარის კალაპოტში, მეორე მის დასავლეთით, ხევის შედარებით მაღალ ნაპირზე. გვიანდელი ბრინჯაოს - ადრინდელი რკინის ხანის მასალა ზედაპირულად აკრეფილია რამდენიმე ადგილას: მდინარე გლდანის ხევის მარცხენა ნაპირზე, სოფელი გლდანის სასაფლაოს ახლოს და ძველი გლდანის ტერიტორიაზე ადგილ ნარსელასა და ისმაილაზე. სოფლის სასაფლაოს ახლოს მდებარეობს გვიანდელი ანტიკური ხანის სამაროვანიც. გლდანის მასივის IV და V მიკრორაიონებს შორის, ადგილ საბატონოზე გათხრილია ნასახლარი და 2 სხვადასხვა დროს აგებული ეკლესია. ფეოდალური ხანის ნასახლარები მიკვლეულია ადგილ ისმაილაზე, ნარსელასა და ხევძარას სამაროვნის ტერიტორიაზე.

ლიტერატურა[რედაქტირება | წყაროს რედაქტირება]

  • ენციკლოპედია თბილისი, თბ., 2002, გვ. 796