გიორგი დადიშქელიანი

მასალა ვიკიპედიიდან — თავისუფალი ენციკლოპედია

გიორგი (ჯანსუღ) თენგიზის (ნიკოლოზის) ძე დადიშქელიანი (დ. 23 აგვისტო, 1858, მესტია, — გ. 1921) — რუსეთის არმიის გენერალ–მაიორი (1917).

ბიოგრაფია[რედაქტირება | წყაროს რედაქტირება]

ეცერ-ცხუმარის მფლობელ დადიშქელიანთა შთამომავალი (ჯანსუღ დადიშქელიანის შვილიშვილი). დაამთავრა თბილისის კლასიკური გიმნაზია და იუნკერთა სასწავლებელი. 1876 წლიდან მსახურობდა ერევნის ლაიბგვარდიის გრენადერთა პოლკში. მონაწილეობდა რუსეთ-ოსმალეთის ომში (1877-1878). 1885 წლიდან ქუთაისის გუბერნიის სამხედრო-ადმინისტრაციულ უწყებებში მუშაობდა. 1893-1899 წლებში იყო ოზურგეთის, ზუგდიდის, რაჭის და ქუთაისის მაზრების უფროსი. სხვადასხვა დროს მონაწილეობდა გლეხთა გამოსვლების ჩახშობაში, ყაჩაღური ბანდების დევნაში. 1906 წელს დაინიშნა ქუთაისის ვიცე-გუბერნატორად, ამავე წელს გადაიყვანეს ყარსის ოლქის გუბერნატორად. 1908 წლიდან დაღესტნის სამხედრო გუბერნატორის თანაშემწე იყო. 1912-1915 წლებში სამხედრო სამსახურთან ერთად ბაქოს ოკრუგის საპატიო სამოქალაქო მოსამართლის მოვალეობასაც ასრულებდა. 1915 წლის ივნისიდან 1917 წლის იანვრამდე მუშაობდა დაღესტნის სამხედრო გუბერნატორად. მისი ორივე ვაჟი I მსოფლიო ომის ფრონტზე დაიღუპა. 1917 წლის ოქტომბერში ჯანმრთელობის მდგომარეობის გამო პენსიაზე გავიდა და თბილისში დასახლდა. დაჯილდოებული იყო წმ. ვლადიმირის, წმ. ანას, წმ. სტანისლავის სხვადასხვა ხარისხის ორდენებითა და საფრანგეთის საპატიო ლეგიონის ორდენის კომანდორის ჯვრით.

ლიტერატურა[რედაქტირება | წყაროს რედაქტირება]

  • ბოროზდინი კ., სამეგრელო და სვანეთი. 1884-1861, ტფ., 1934
  • გაბლიანი ე., ძველი და ახალი სვანეთი, ტფ., 1925