არგოხის ეკლესია

არგოხის ეკლესია — ეკლესია ახმეტის მუნიციპალიტეტის სოფელ არგოხში, დგას სოფლის ჩრდილო-აღმოსავლეთით, სასაფლაოზე. განეკუთვნება გვიანდელ შუა საუკუნეებს.

ეკლესია დარბაზულია (5,3 X 3,6 მ), ნაგებია რიყისა და ნატეხი ქვით. წყობა ირეგულარულია - ტლანქი. ძეგლი ძლიერ დაზიანებულია. შემორჩენილია აღმოსავლეთ ნახევარი (სიმაღლე 2,8-3,2 მ) და დანარჩენი კედლების მცირე ნაწილები. შესასვლელი სამხრეთიდან ჰქონია. აღმოსავლეთით ნახევარწრიული აფსიდის ღერძზე მცირე ზომის სარკმელია, რომელსაც მხოლოდ ჩრდილოეთ წირთხლი და გარეთა გადახურვის ქვა შემორჩა. სარკმლის ორივე მხარეს თითო სწორკუთხა ნიშია. აფსიდი გადახურული ყოფილა სხმული კონქით (შემორჩენილია მცირე ნაწილი).

ლიტერატურა

• დვალი თ., საქართველოს ისტორიისა და კულტურის ძეგლთა აღწერილობა, ტ. 2, გვ. 54, თბ., 2008 წელი.

რესურსები ინტერნეტში

• არგოხის ეკლესია dzeglebi.com-ზე