აზერბაიჯანის ეროვნული წინააღმდეგობის ორგანიზაცია
აზერბაიჯანის ეროვნული წინააღმდეგობის ორგანიზაცია (აზერ. Azərbaycan Milli Dirəniş Təşkilatı) — ორგანიზაცია, რომელიც მშვიდობიანი გზით იბრძვის სამხრეთ აზერბაიჯანში მცხოვრები აზერბაიჯანელების ეროვნული თვითგამორკვევის უფლებებისთვის[1].
ორგანიზაცია დაარსდა 2006 წლის 19 მარტს და ებრძვის სპარსულ შოვინიზმს, ერთიანობისა და ეროვნული იდენტობის დაცვის მიზნით[2]. მისი მანიფესტი მხარს უჭერს სამხრეთ აზერბაიჯანში თურქულენოვანი მოსახლეობის უფლებას განსაზღვროს საკუთარი პოლიტიკური მომავალი[3].
2010 წლის 3 სექტემბერს ბაბეკ ჩელებიანლიმ დააარსა ვებგვერდი Araz News, რომელიც ორგანიზაციის ოფიციალურ საინფორმაციო პლატფორმად იქცა და დღეს სამ ენაზე ავრცელებს ინფორმაციას[1][4].
მიზნები და პრინციპები
[რედაქტირება | წყაროს რედაქტირება]ორგანიზაცია მხარს უჭერს:
- აზერბაიჯანელი თურქი ერის გათავისუფლებას სიღარიბისა და იძულებითი მიგრაციისგან.
- თანასწორობისა და დისკრიმინაციისგან თავისუფალ ცხოვრებას.
- ეროვნული თვითგამორკვევის უფლებას აზერბაიჯანული და თურქული იდენტობის საფუძველზე.
- გაყოფილი ქვეყნის გაერთიანების იდეას.
სტრატეგია
[რედაქტირება | წყაროს რედაქტირება]ორგანიზაციის სტრატეგია:
- ეროვნული გამოღვიძების პროცესის წინსვლა.
- ეროვნული ერთიანობის გაძლიერება.
- შოვინისტური პოლიტიკის წინააღმდეგ ბრძოლა.
- ახალი ლიდერებისა და სპეციალისტების მომზადება.
- სამოქალაქო და კულტურული ბრძოლის პრინციპის დაცვა, ძალადობის თავიდან აცილება.
- წინააღმდეგობის ცენტრების შექმნა და ინფორმაციის მუდმივი ანალიზი.
- ორგანიზაციის ფარული და ნახევრად ფარული მუშაობა დღევანდელი პირობების გათვალისწინებით[5].
წარმომადგენლობა და საერთაშორისო საქმიანობა
[რედაქტირება | წყაროს რედაქტირება]ორგანიზაციის პირველი სპიკერი იყო დავუდ თურანი, ხოლო ამჟამინდელი სპიკერია ბაბეკ ჩელაბიანლი, რომელიც ემიგრაციაში, ვაშინგტონში ცხოვრობს. ორგანიზაციის ლიდერებს შორის ასევე არიან ბაბეკ შაჰიდი, მაჯიდ არაზი და ოღუზ ბაჰადირი[5].
2016 წელს ორგანიზაციამ სამხრეთ აზერბაიჯანში საიდუმლო ღონისძიებები ჩაატარა იუბილეს აღსანიშნავად, ხოლო 2017 წელს – ანკარასა და ვაშინგტონში. ბაბეკ ჩელებიანლიმ ისრაელის საგარეო საქმეთა სამინისტროს წერილით მიმართა და გააპროტესტა ახალი ქურთული სახელმწიფოს შექმნა და ურმიის შესაძლო ჩართვა მის საზღვრებში[6].