შინდისის ნათლისმცემლის ეკლესია
შინდისის ნათლისმცემლის ეკლესია – ეკლესია გორის მუნიციპალიტეტის სოფელ შინდისის ჩრდილოეთით, ერთი კილომეტრის მოშორებით, თარიღდება X-XI საუკუნეებით.
ეკლესია დარბაზულია (10,5 X 6 მ), ნაგებია რიყის ქვით, სვეტებზე, თაღებზე, სამხრეთის კარის წირთხლზე და აღმოსავლეთის ფასადის სარკმელზე გამოყენებულია თლილი მოწითალო ქვა. ეკლესიას შესასვლელი სამი მხრიდან აქვს: სამხრეთიდან, დასავლეთიდან და ჩრდილოეთიდან. ნახევარწრიულ აფსიდში ერთი სარკმელი და სამი ნიშია. ნიშებს ქვის თაღები აქვს. სამხრეთ კედელში ორი სარკმელია, დასავლეთისაში - ერთი. ჩრდილოეთ კედელში, იატაკიდან 1,5 მეტრის სიმაღლეზე, პატარა სარკმელი და კარია, რომელიც ჩრდილოეთ მინაშენში გადის. დარბაზის გრძივ კედლებზე ორსაფეხურიანი პილასტრებია, რომლებსაც ეყრდნობა ცილინდრული კამარის საბჯენი თაღები. გრძივ კედლებზე გადადის ორ-ორი დეკორატიული თაღი. აღმოსავლეთის ფასადის სარკმლის თავზე, ქვაზე, რელიეფური ჯვარია გამოსახული. ეკლესიის სახურავი ორფერდაა. ჩრდილოეთით მიშენებული ნაგებობების სიგანე ერთი მეტრია. მის აღმოსავლეთის და ჩრდილოეთ კედლებში თითო სარკმელია. გადახურვა ცილინდრულია.
ლიტერატურა[რედაქტირება | წყაროს რედაქტირება]
- საქართველოს ისტორიისა და კულტურის ძეგლთა აღწერილობა, ტ. 5, თბ., 1990. — გვ. 118.