ფრიდენსრაიხ ჰუნდერტვასერი

თავისუფალი ქართულენოვანი ენციკლოპედია ვიკიპედიიდან
გადასვლა: ნავიგაცია, ძიება
ჰუნდერტვასერი 1998 წელს ახალ ზელანდიაში

ფრიდენსრაიხ ჰუნდერტვასერი (გერმ. Friedensreich Hundertwasser, ნამდვ. სახელი Friedrich Stowasser — ფრიდრიხ შტოვასერი; დ. 15 დეკემბერი, 1928, ავსტრია (ვენა) — გ. 19 თებერვალი, 2000, ახალი ზელანდია) — ავსტრიელი არქიტექტორი და ფერმწერი, ორიგინალური შენობების შემქმნელი "ბუნებრივ", "ეკოლოგიურ" და "ბიომორფულ" სტილში. მისი ერთ-ერთი პირველი და ყველაზე განთქმული პროექტი იყო ჰუნდერტვასერჰაუზი ვენაში, რომელიც შემდგომში მთელი მისი შემოქმედების ლეიტმოტივი გახდა.

ჰუნდერტვასერის ორიგინალური, უმართავი, ზოგჯერ შოკისმომგვრელი არტისტული ხედვა აისახა მის ფერწერაში, ეკოლოგიურობაში, ფილოსოფიაში, ფასადების დიზაინში, საფოსტო მარკებში, დროშებში და ტანსაცმელში. მის ნამუშევრებში გავრცელებულ თემათა შორისაა სწორი ხაზის უარყოფა, მკვეთრი ფერები, ორგანული ფორმები, ადამიანთა დაახლოება ბუნებასთან და მკაცრი ინდივიდუალიზმი. ის დღემდე რჩება განუმეორებლად, თუმცა მისი არქიტექტურული ნამუშევრები ემსგავსება ანტონიო გაუდისას ბიომორფულ ფორმებში და ფილების გამოყენებაში. ადრეულ პერიოდში მას შთაგონება ეგონ შილეს ნამუშევრებიდან მიუღია და მის სტილს ხშირად ადარებდნენ გუსტავ კლიმტის ხელწერას. ის აღტაცებაში მოჰყაავდა სპირალებს და სწორ ხაზებს "ეშმაკის ხელსაწყოებს" უწოდებდა. ის ხელოვნების საკუთარ თეორიას "ტრანსავტომატიზმს" უწოდებდა, სიურრეალისტურ ავტომატიზმზე დაყრდნობით, ყურადღებას ამახვილებდა რა მნახველის გამოცდილებაზე, თვით ხელოვანის განცდის ნაცვლად.