რაზდანი (მდინარე)

რაზდანი (ზანგა)
დახასიათება
სიგრძე	141 კმ
აუზის ფართობი	7310 კმ²
ჩაედინება	არაქსი
ქალაქები	სევანი, რაზდანი, ჩარენცავანი, არზნი, ერევანი.

რაზდანი, სომხ. Հրազդան, ზანგა — მდინარე სომხეთში, მდინარე არაქსის მარცხენა შენაკადი (მტკვრის აუზი). სიგრძე 141 კმ, აუზის ფართობი სევანის ტბის აუზთან ერთად 7310 კმ², საკუთრივ რაზდანისა — 2560 კმ². სათავე აქვს სევანის ტბაში. ზემოთში მთის მდინარეა, ქვემოთ არარატის ვაკეზე მიედინება. ბუნებრივ პირობებში (ჰესების კასკადის შექმნამდე) წყლის საშუალო ხარჯი სათავესთან დაახლოებით 2 მ³/წმ შეადგენდა, შესართავთან ახლოს — 17,9 მ³/წმ. რაზდანზე აგებულია სევანის ჰიდროელექტროსადგურების კასკადი. მდინარეს იყენებენ აგრეთვე სარწყავად. რაზდანის ნაპირზეა ქალაქები: სევანი, რაზდანი, ჩარენცავანი, არზნი, ერევანი.

ლიტერატურა

• ქართული საბჭოთა ენციკლოპედია, ტ. 8, გვ. 289-290, თბ., 1984 წელი.