ოხაჩქუის ქედი
| ოხაჩქუის ქედი | |
|---|---|
| კოორდინატები: 42°46′42″ ჩ. გ. 41°56′35″ ა. გ. / 42.778444° ჩ. გ. 41.943222° ა. გ. | |
| ქვეყანა |  საქართველო
|
| ტერიტორიული ერთეული | წალენჯიხის მუნიციპალიტეტი |
| უმაღლესი წერტილი | ოხაჩქუე |
| სიმაღლე | 2156 მ |
| ამგებელი ქანები | კირქვა |
  | |
 | |
ოხაჩქუის ქედი — ქედი საქართველოში, სამეგრელო-ზემო სვანეთის მხარის წალენჯიხის მუნიციპალიტეტში. მდებარეობს აფხაზეთის კავკასიონის სამხრეთ კალთის პერიფერიულ ზოლში, ოხაჩქუის მასივის ამაღლებულ ნაწილზე, მდინარეების ენგურისა და ოქუმის ხეობებს შორის. უმაღლესი წერტილი — მთა ოხაჩქუე (2156 მ). აგებულია ცარცული, ზედაიურული და ეოცენური კირქვებით, რომლებშიც კარსტი ვითარდება. კარსტული ძაბრების გარდა ბევრია შახტები და მღვიმეები. ქედის კალთები ზღვის დონიდან 2000 მ სიმაღლემდე შემოსილია ტყით (დაბლა ფოთლოვანი, მაღლა წიწვიანი), თხემი - სუბალპური მდელოებით. ოხაჩქუის მასივზე არის ჩაკეტილი ქვაბულები (დიდი და მცირე ოფუჯე, ოთეფურე, ოჭაკე, ჯაკონა), რომლებშიც ზამთრობით ცივი ჰაერი გუბდება და ალპური ზონისათვის დამახასიათებელი მცენარეები იზრდება (მათ შორის იშვიათი ვარდისფერი როდოდენდრონი — დეკისა და შქერის ჰიბრიდი). ოჭაკის ქვაბულში არის ადგილობრივი მნიშვნელობის კურორტი „აერო“.
ლიტერატურა[რედაქტირება | წყაროს რედაქტირება]
- მარუაშვილი ლ, ქართული საბჭოთა ენციკლოპედია, ტ. 7, თბ., 1984. — გვ. 625.