მქირდავა

მქირდავა (Hippolais), ფრინველთა გვარი ბეღურასნაირთა რიგისა. გავრცელებულია ევროპაში, აზიაში, აფრიკაში. პატარ-პატარა ფრინველებია. ბინადრობენ ფოთლოვან ტყეებსა და პარკებში, ხშირ ბუჩქნარებში, ტყისპირებში, უდაბნოებში, მთების კალთებზე, ველებსა და ჭალებში. ბუდეს იკეთებენ ხეზე, ბუჩქზე, მიწაზე. დედალი 4-6 კვერცხს დებს, კრუხობა 2 კვირამდე გრძელდება. იკვებებიან წვრილი მწერებითა და მათი მატლებით, კენკრით. საქართველოში ბუდობს ერთი - დიდი ბუტბუტა (Hippolais pallida), რომელიც ზამთარს აფრიკაში ატარებს.

ლიტერატურა

• რ. ჟორდანია, ქსე, ტ. 7, გვ. 235, თბ., 1984