კასპის მუნიციპალიტეტი

კასპის მუნიციპალიტეტი
რეგიონი	შიდა ქართლის მხარე
დეპუტატი პარლამენტში	კობა კურდღელაშვილი
სიმჭიდროვე	65  კაცი/კმ²
ფართობი	803.2 კმ²
მოსახლეობის რაოდენობა	52.100 კაცი (2006)
ეროვნება	ქართველები 83.3% აზერბაიჯანელები 8.4% ოსები 7.5% სომხები 0.4% რუსები 0.3%

კასპის მუნიციპალიტეტი არის ადმინისტრაციული რაიონი შიდა ქართლის მხარეში. რაიონის ტერიტორია 1917 წლამდე ტფილისის გუბერნიის გორის მაზრაში შედიოდა, 1917–30 წლებში — გორის მაზრაში, 1930 წლიდან ცალკე რაიონია. რაიონული ცენტრია ქალაქი კასპი.

ბუნება

მდებარეობს შიდა ქართლის ვაკეზე, მტკვრის ორივე მხარეს. ტერიტორია - 802 კვ.კმ., მათ შორის სასოფლო-სამეურნეო სავარგულებს უკავია 360 კვ.კმ. ჩრდილოეთითი მას აკრავს კავკასიონის სამხრეთი განშტოებანი, სამხრეთით — თრიალეთის ქედი. რაიონის ტერიტორიაზე მიედინება მდინარეები მტკვარი, ქსანი, ლეხურა, კავთურა, თეძამი.

მოსახლეობა

მოსახლეობის რიცხოვნობა — 48 ათასი კაცი; სიმჭიდროვე — 61 კაცი კვ.კმ-ზე. რაიონში 72 დასახლებული პუნქტია: 1 ქალაქი, 71 სოფელი.

მმართველობა

რაიონის წარმომადგენლობითი ორგანოა რაიონის საკრებულო, ხოლო აღმასრულებელი ორგანო — გამგეობა. რაიონის ადგილობრივი თვითმმართველობის ადმინისტრაციული ერთეულებია:

• ქალაქის საკრებულო — 1: კასპი (მიქელწყარო, მირიანი);
• თემის საკრებულო — 16: აღაიანის (საქადაგიანო, ხიდისყური), ახალქალაქის (ახალსოფელი, გარიყულა, გოსტიბე, ერთაწმინდა, ზემო ჩოჩეთი, თეძმისხევი, კაპრაშიანი, ჩაჩუბეთი), ახალციხის (მთიულთუბანი, ნოსტე, ცხავერი), გომის (ნიაბი), დოესის (გრაკალი), ზემო ხანდაკის, (ზენადრისი, ფაშიანი, ჭყოპიანი), თელიანის (სასირეთი), კავთისხევის (გუდალეთი, ეზატი, თვალადი, ქებაანი, ქვემო ჩოჩეთი, ქვემო ხანდაკი), კოდისწყაროს (ზადიანთკარი, ზემო რენე, ნიგოზა, სარიბარი, ქვემო რენე, ყარაფილა, ჩობალაური), ლამისყანის (თვაურები, ხვითი), მეტეხის (ბარნაბიანთკარი), ოკამის (თეზი, იგოეთი, მრგვალი ჭალა, ფერმა, ჩანგილარი), სამთავისის (ბოჟამი, თოგოიანთკარი), ქვემო ჭალის (ახალშენი, გამდლისწყარო, გორაკა, ვაკე, პანტიანი, საკორინთლო), წინარეხის (გომისჯვარი, თელათგორი, იდლეთი, ლავრისხევი), ხოვლეს.

ეკონომიკა

რაიონში შემდეგი სამრეწველო საწარმოები იყო: კასპის ცემენტის ქარხანა, მეტეხის საშენ მასალათა კომბინატი, აგრეთვე კვების მრეწველობის საწარმოები, ღვინის და საკონსერვო ქარხნები. სოფლის მეურნეობის წამყვანი დარგებია: მევენახეობა, მეხილეობა, მებოსტნეობა, სარძევე მეცხოველეობა. მოჰყავთ მარცვლეული. რაიონს კვეთს ქვეყნის მთავარი სარკინიგზო და საავტომობილო მაგისტრალები.

კულტურა

რაიონში 49 სახელმწიფო და 2 არასახელმწიფო ზოგადსაგანმანათლებლო სკოლაა, 2 საშუალო პროფესიული და 1 უმაღლესი სასწავლებელი, 43 ბიბლიოთეკა, 1 თეატრი და 2 მუზეუმი. (მხარეთმცოდნეობის მუზეუმი, ი.ჯავახიშვილის სახ. მუზეუმი ხოვლეში).

ღირსშესანიშნაობანი

რაიონში არქიტექტურის და კულტურის მრავალი მნიშვნელოვანი ძეგლია: რკონის კომპლექსი, სამთავისის ტაძარი, სხვილოს ციხე-დარბაზის კომპლექსი, ქვათახევის, მეტეხის, ახალქალაქის კომპლექსები და სხვა.