დრონტისებრნი

დრონტისებრნი (Raphidae), ფრინველების ოჯახი მტრედისნაირთა რიგისა. ამოწყდა XVII-XVIII საუკუნეებში. დრონტისებრნი ბატის ზომისა იყვნენ, წონა 20 კგ აღწევდა. ჰქონდათ მასიური ნისკარტი და განუვითარებელი ფრთები. ცხოვრობდნენ მასკარების კუნძულებზე, სადაც ძლიერი მტერი არ ჰყავდათ, ამიტომ თანდათან დაკარგეს თავდაცვის უნარი და შემდეგ კოლონისტების მიერ შემოყვანილმა ღორებმა ადვილად გაანადგურეს ისინი. ცნობილია 3 სახეობა: დოდო — გავრცელებული იყო მავრიკის კუნძულებზე; მეუდაბნოე — კუნძულ როდრიგესზე; თეთრი დოდო — კუნძულ რეუნიონზე. დრონტისებრნი ბინადრობდნენ მიწაზე, სადაც სეზონის განმავლობაში დებდნენ თითო თეთრ კვერცხს.

ლიტერატურა

• ქართული საბჭოთა ენციკლოპედია, ტ. 3, გვ. 644, თბ., 1978 წელი.