დავით II (კახეთის მეფე)

თავისუფალი ქართულენოვანი ენციკლოპედია ვიკიპედიიდან
გადასვლა: ნავიგაცია, ძიება
Disambig-dark.svg სხვა მნიშვნელობებისთვის იხილეთ დავით II.
დავით II
იმამყული-ხანი
კახეთის მეფე
მმართ. დასაწყისი: 1703
მმართ. დასასრული: 1722
წინამორბედი: არჩილ II
მემკვიდრე: კონსტანტინე II
პირადი ცხოვრება
დაბ. თარიღი: 1678
გარდ. თარიღი: 1722
შვილები: ალექსანდრე, ასლან-მირზა.
დინასტია: ბაგრატიონები
მამა: ერეკლე I

დავით II, ასევე ცნობილი იმამყული-ხანის სახელით (გ. 1722) — კახეთის მეფე 1703-1722 წლებში, ერეკლე I-ის ძე.

დაიბადა და ბავშვობა გაატარა ირანში. მისი მმართველობის დროს კახეთში ლეკიანობა მძვინვარებდა. 1706 წელს ჭარ-ბელაქანში კახელთა მარცხიანი ლაშქრობის შემდეგ ლეკებმა დაიკავეს ელისენი. დავით II იძულებული გახდა რეზიდენცია ყარაჯიდან თელავსა და მანავში გადაეტანა (ზაფხულობით მაღაროს იდგა). 1711 წელს ირანში გაემგზავრა და კახეთის მმართველად თავისი ძმა თეიმურაზი და დედა — დედოფალი ანა დატოვა. ამ პერიოდში განსაკუთრებით გახშირდა კახეთზე ლეკთა თავდასხმები, ფეოდალთა თვითნებობა, გლეხთა ანტიფეოდალური გამოსვლები. ირანიდან დაბრუნების შემდეგ (1715) დავით II ცდილობდა ქვეყანაში წესრიგის აღდგენას. დაუნათესავდა ქართლის მმართველს იესეს და მისი დახმარებით გაილაშქრა ლეკების წინააღმდეგ, მაგრამ მათთან ბრძოლაში კვლავ დამარცხდა. კახელი ფეოდალები იძულებული გახდნენ ლეკებისათვის ზოგი რამ დაეთმოთ და მათთვის ქართლისა და აზერბაიჯანში სათარეშო გზაც მიეცათ. ამ დროს დაიწყო კახეთის რაიონებში ლეკების ჩამოსახლება. კახელი გლეხები (განსაკუთრებით გაღმა მხარში) მძიმე ფეოდალური ჩაგვრის გამო მასობრივად გადადიოდნენ ლეკების მხარეზე — "ლეკდებოდნენ". ამ მდგომარეობიდან თავის დასაღწევად დავით II-მ დახმარება სთხოვა ქართლის მეფე ვახტანგ VI-ს, მაგრამ მათი ერთობლივი მოქმედება, მიუხედავად ირანის შაჰის მხარდაჭერისა, მაინც ვერ მოხერხდა.

ლიტერატურა[რედაქტირება]

  • სოსელია ო., ქსე, ტ. 3, გვ. 333, თბ., 1978
წინამორბედი:
არჩილ II
კახეთის მეფე
1703 - 1722
შემდეგი:
კონსტანტინე II