| სოფელი
დაბლაგომი
| დროშა |
გერბი |
 |
 |
|
დაბლაგომი - სოფელი სამტრედიის მუნიციპალიტეტში, გომის თემის ცენტრი (სოფლები: გომმუხაყრუა, გომნატეხები, დაფნარი, დობირო, ზედა ეწერი, კვირიკე, მთისძირი, ქვედა ეწერი).
მდებარეობს იმერეთის დაბლობზე, ბაღდათი-დაფნარის საავტომობილო გზაზე. ზღვის დონიდან 40 მეტრი, სამტრედიიდან 14 კილომეტრი. 2002 წლის აღწერის მონაცემებით სოფელში ცხოვრობს 1115 კაცი.
1929 წელს დაბლაგომში აღმოჩნდა მრავალფენიანი არქეოლოგიური ძეგლი. გათხრები ჩატარდა 1936 წელს (ხელმძღვანელები: ნ. ბერძენიშვილი, ბ. კუფტინი, ნ. ხოშტარია). არქეოლოგიური ძიება განახლდა 1970 წლიდან (ხელმძრვანელი ვ. თოლორდავა). დაბლაგომში ნაციხვარისა და ნასაკირევის ბორცვებზე გათხრილია ადრინდელი ბრინჯაოს ხანის ნამოსახლარი, ანტიკური ხანის სამაროვანი და ნასახლართა ნაშთები. ადრინდელი ბრინჯოს ხანის კერამიკა ხელით ნაძერწი, არათანაბრად გამომწვარი და ზედაპირგაპრიალებულია. ჭურჭელი უმეტესად დიდი ზომისაა; ზოგს ძირზე ჭილოფის ანაბეჭდი ეტყობა. გვხვდება დისკოსებური ხუფები, აღმოცენილია აგრეთვე ქვის ხელსაფქვავები, კაჟის ფოთლისებრი შუბისპირები, კაჟისა და ოფსიდიანის ანატკეცები. არქეოლოგიური მასალა ატარებს როგორც აღმოსავლეთ ამიერკავკასიის (კიკეთი, დიდუბე, ოზნი), ისე დასავლეთ საქართველოს უძველეს ნამოსახლართა (ოჩამჩირე, დიხა გუძუბა) კულტურის ნიშნებს.
ანტიკური ხანის ნამოსახლარებზე დადასტურებულია ცხოვრების 2 პერიოდი:ადრინდელი ანტიკური (ძვ. წ. VI-IV სს.) და ადრინდელი ელინისტური (ძვ. წ. IV-III სს.). ადრინდელი ანტიკური ხანის ფენაში გვხვდება ხის წნულის ანაბეჭდიანი ბათქაშები, ორნამენტით შემკული კოლხური კერამიკის ფრაგმენტები (სასმისები, დოქები, ჯამები, ქვევრები და სხვ.). დაბლაგომში გათხრილია ადრინდელი ელინისტური პერიოდის ქვევრსამარხები. სამარხად გამოყენებულია სამეურნეო დანიშნულების კოლხური ქვევრები. სამარხეული ინვენტარი ღარიბულია (თიხის ჭურჭელი, ბრინჯაოს და რკინის სამკაული, ვერცხლის მონეტები), რაც გვიჩვენებს, რომ ქვევრსამარხებში საზოგადოების რიგით წევრებს კრძალავდნენ. 1972 წელს ნაციხვარის ბორცვზე აღმოჩნდა ძვ. წ. III საუკუნის I ნახევრის წარჩინებული პირის მდიდრული სამარხი, რომელიც წარმოადგენს კლდეში ამოკვეთილ ორმოში ჩადგმულ სინოპური კრამითით გადახურულ სწორკუთხა ხის ნაგებობას. მასში აღმოჩნდა ოქროს სამკაული, ოქროსა და ვერცხლის ჭურჭელი, რკინის იარაღი, სხვადასხვა მასალისგან დამზადებული მძივები და საკიდები, მრავალი ადგილობრივი და შემოტანილი თიხის ჭურჭელი. არქეოლოგიური მასალა მოწმობს, რომ ანტიკურ ხანაში დაბლაგომი ქალაქური ტიპის მნიშვნელოვანი სავაჭრო და სახელოსნო ცენტრი იყო. ძვ. წ. III ს. ბოლოს დაბლაგომში ცხოვრება შეწყდა.
დაწყებითი სკოლა დაბლაგომში 1918 წელს გაიხსნა. 1933 წლიდან სკოლა არასრულ საშუალო, ხოლო 1994 წლიდან - საშუალო სკოლად გადაკეთდა. სკოლაში ასწავლის 25 პედაგოგი და სწავლობს 193 მოსწავლე. შენობის ფართობი შეადგენს 1962 კვ.მ-ს, სრული ფართობია 6700 კვ.მ. სკოლაში დადიან შემდეგი სოფლებიდან: საკუთრივ დაბლაგომი, კეთილაური, ცივწყალა, დაფნარი. სოფელში მოქმედებს საბავშვო ბაღი.
[რედაქტირება] რესურსები ინტერნეტში
- საქართველოს არქეოლოგია, თბ., 1959;
- Куфтин Б. А., Материалы к археологии Колхиды, т. 2, Тб., 1950;
- თოლორდავა ვ., ფხაკაძე გ., ქსე, ტ. 3, გვ. 326, თბ., 1978
სტატიის 
მთავარი სტატია : დაბლაგომის ნამოსახლარი.
