ბაღდათის მუნიციპალიტეტი

ბაღდათის მუნიციპალიტეტი
ადმინისტრაციული ცენტრი	ბაღდათი
რეგიონი	იმერეთის მხარე
დეპუტატი პარლამენტში	თემურ კოხოძე
სიმჭიდროვე	35.9  კაცი/კმ²
ფართობი	815 კმ2
მოსახლეობის რაოდენობა	28700 კაცი (2010 წელი)
ეროვნება	ქართველები 99.5% რუსები 0.3% სომხები 0.1% უკრაინელები 0.02% ოსები 0.02%

ბაღდათის მუნიციპალიტეტი — თვითმმართველი ერთეული იმერეთის მხარეში. მუნიციპალიტეტის ტერიტორია 1917-მდე შედიოდა ქუთაისის გუბერნიის ქუთაისის მაზრაში, 1917-28 — ქუთაისის მაზრაში, 1930 წელს გამოიყო ცალკე რაიონად. 1940-90 — მაიაკოვსკის რაიონი ერქვა.

ბუნება

მუნიციპალიტეტის ტერიტორია უმეტესად მთაგორიანია, იგ მდებარეობს მესხეთის ქედის კალთებზე, მთისწინეთსა და იმერეთის დაბლობზე. ტერიტორია — 815 კვ.კმ., მათ შორის სასოფლო-სამეურნეო სავარგულებს უკავია 82.22 კვ.კმ. ბაღდათის ტერიტორიის 67, 5% ტყით არის დაფარული; გავრცელებული ჯიშებია მუხა, კაკალი, კოპიტი, წაბლი, ნაძვი, ფიჭვი, თხმელა. მუნიციპალიტეტის მთავარი მდინარეა ხანისწყალი, რომელიც სათავეს იღებს მესხეთის ქედზე და ერთვის რიონს, აგრეთვე მისი შენაკადები (საკრაულა, ლაიშურა და სხვები).

ჰავა

კლიმატი ნესტიანი და სუბტროპიკულია. ზამთარი საშუალოდ ცივია, ხოლო ზაფხული საკმაოდ ცხელი. წლის საშუალო ტემპერატურა +14 გრადუსია ცელსიუსით, იანვარში +4,4 გრადუსია, ივლისში კი +23 გრადუსი. აბსოლუტური მინიმუმი -8 გრადუსი; აბსოლუტური მაქსიმუმი +42 გრადუსი. წლიური ნალექიანობა – 1500 მგ.

წიაღისეული

მუნიციპალიტეტი მდიდარია სამკურნალო მინერალური წყლებით, რომელთა შორის აღსანიშნავია მინერალური წყალი საირმე. მუნიციპალიტეტში არის ტუფის, გრანიტის, მარმარილოს საბადოები.

მოსახლეობა

მოსახლეობის რიცხოვნობა — 29 ათასი კაცი; სიმჭიდროვე — 36 კაცი კვ.კმ-ზე. მუნიციპალიტეტში 23 დასახლებული პუნქტია: 1 ქალაქი და 22 სოფელი.

მოსახლეობის უმრავლესობა მართლმადიდებელი ქრისტიანია. მოქმედებს 12 ტაძარი. მუნიციპალიტეტის ტერიტორია ვანისა და ბაღდათის ეპარქიას ექვემდებარება.

ადგილობრივი თვითმმართველობა

მუნიციპალიტეტის ადგილობრივი თვითმმართველობის უმაღლესი ორგანოა მუნიციპალიტეტის საკრებულო, მმართველობის ადმინისტრაციულ-ტერიტორიული ერთეულებია:

• ქალაქი - 1: ბაღდათი;
• თემი - 6: დიმი, ზეგანი, ნერგეეთი, როკითი, ფერსათი, ხანი;
• სოფელი - 6: ვარციხე, მეორე ობჩა, პირველი ობჩა, როხი, საკრაულა, წითელხევი.

ეკონომიკა

მუნიციპალიტეტში ეკონომიკის წამყვანი დარგია მევენახეობა და მეღვინეობა. გავრცელებულია აგრეთვე მეხილეობა, მებოსტნეობა, ნაწილობრივ მეცხოველეობა. მრეწველობის მთავარი დარგია კვების მრეწველობა: ღვინის ქარხნები, ასევე ცნობილია ვარციხის კონიაკის ქარხანა. განვითარებულია საშენი მასალების წარმოება.

მუნიციპალიტეტში გადის შიდასახელმწიფოებრივი მნიშვნელობის გზები ქუთაისის, ზესტაფონის, ვანისა და აბასთუმნის მიმართულებით.

მუნიციპალიტეტის ტერიტორიაზე მდებარეობს ორი ბალნეოლოგიური კურორტი: საირმე და ზეკარი. მოიპოვება და იწარმოება მინერალური წყალი საირმე, რომლის 80% ექპორტისათვის არის განკუთვნილი.

კულტურა

მუნიციპალიტეტში 27 საჯარო სკოლაა, 1 საშუალო პროფესიული სასწავლებელი, 23 ბიბლიოთეკა, 1 თეატრი და 1 მუზეუმი. ქალაქ ბაღდათში არის ვლადიმერ მაიაკოვსკის სახლ-მუზეუმი.

ღირსშესანიშნაობანი

ისტორიული ძეგლები:

• როდოპოლისი - უძველესი ციხესიმაგრე სოფელ ვარციხეში, რომელთანაც დაკავშირებულია არგონავტების მითი.
• ბაღდათის ციხე (1703 წ.)
• ფეოდალური ხანის კოშკი კოშკი დიმში
• 12 მოციქულის სახელობის ეკლესია სოფელ ხანში
• შუა საუკუნეების ფერისცვალების ეკლესია როკითში
• ეკლესია ქვედა ზეგანში
• შუა საუკუნეების ორი ეკლესია წითელხევში

ბუნების ძეგლები:

• ბაღდათის მუნიციპალიტეტის ტერიტორიაზე მდებარეობს აჯამეთის აღკვეთილი, ფართობი 4848 ჰა.