არალიისებრნი

არალიისებრნი (Araliaceae), ორლებნიან მცენარეთა ოჯახი. ხეები ან ბუჩქები (ზოგჯერ მცოცავი), იშვიათად კი მრავალწლოვანი ბალახებია. ყვავილები შეკრებილია რთულ ქოლგებად, თავაჯებად ან თავთავებად. ნაყოფი ხშირად წვნიანია. არალიისებრთა ოჯახი აერთიანებს 70-მდე გვარსა და 850-მდე სახეობას. გავრცელებულია უმთავრესად ტროპიკებსა და სუბტროპიკებში.

საქართველოს ბაღებსა და პარკებში იზრდება დეკორატიული ჩინური არალია (Araliaceae chinensis || Araliaceae mandshurica), ეკლიანი არალია (Araliaceae spinosa), სურო, რომელიც ბუნებრივადაც გვხვდება, და სხვა. ტექნიკური მნიშვნელობა აქვს იაპონურ ქაღალდის ხეს (Tetrapanax papyriferum), რომლის გულგულისაგან ჩინეთში ამზადებენ ქაღალდს; კულტივირებულია კავკასიაში შავი ზღვის სანაპიროზე, კერძოდ, დასავლეთ საქართველოში.

არალიისებრთა ოჯახში შედის აგრეთვე მნიშვნელოვანი სამკურნალო მცენარეები (ჟენშენი, ელეუთეროკოკი და სხვა).

ლიტერატურა

• ქსე, ტ. 1, გვ. 536-537, თბ., 1975